Ամենաթարմ տվյալներով, որոնք նախորդ օրը հրապարակել է ՀՀ Ազգային վիճակագրական ծառայությունը, 2012 թվականի դեկտեմբերին 2011 թվականի դեկտեմբերի համեմատ՝ գործազուրկների թիվը ավելացել է՝ 220 հազարից դարձել է 222 հազար։
Երբ խոսք է գնում մեր պաշտոնական վիճակագրության մասին, ապա պետք է անպայման ավելացնել հետեւյալ դիտարկումը, եթե պաշտոնապես արձանագրվել է, որ 2 հազարով են ավելացել գործազուրկները, ապա իրականում թիվը ավելացել է մի 10-15 հազարով։ Մեր վիճակագիրների ստեղծագործ մտքին ծանոթ մարդկանց մոտ սա թերեւս կասկած չի առաջացնի։
Հիմա աշխատավարձի մասին։ Մեր ԱՎԾ-ի տվյալներով, օրինակ, այս տարվա առաջին երեք ամիսներին անցած տարվա նույն ժամանակահատվածի համեմատ՝ միջին անվանական աշխատավարձը աճել է 3,8 տոկոսով։ Բայց այս նույն համեմատության մեջ դրամը արժեզրկվել է 5.4 տոկոսով։ Այլ կերպ ասած, դոլարի վերածելու դեպքում՝ Հայաստանում աշխատավարձը նվազել է։ Ի դեպ, աշխատավարձերի մասին։ «Մեր աշխատանքով պետք է Հայաստանը քայլի ժամանակին համընթաց՝ յուրացնելով ոչ միայն նորարարությունները, այլեւ աշխատանքի կազմակերպման եւ աշխատավորների իրավունքների պաշտպանության ամենաառաջադիմական ձեւերն ու չափանիշները»,- ասում է Սերժ Սարգսյանը։ Այդ ի՞նչ չափանիշների մասին է ասում Սերժ Սարգսյանը։ Էլի դիմենք վիճակագրությանը։ Ըստ այդմ, Հայաստանում աշխատավարձ է ստանում 470 հազար մարդ։ Նրանց 20 տոկոսի ամսական աշխատավարձը չի հասնում 35 հազար դրամի, 65 տոկոսինը՝ 75 հազար դրամից ցածր է։ Եվ սա Սերժ Սարգսյանի պաշտոնավարության 5 տարիներից հետո։
Հայկ ԳԵՎՈՐԳՅԱՆ
Կարդացեք նաև
«Հայկական ժամանակ»
