Մամուլում բազմաթիվ հրապարակումներ եղան այն մասին, որ Երեւանի ավագանու ընտրություններում ԲՀԿ չորրորդ համարը զբաղեցնող Սերգեյ Բագրատյանը Վայոց Ձորի մարզպետ եղած տարիներին «կաշառքով հարցեր է լուծել»: Այսօր «Հայելի» մամուլի ակումբում անդրադառնալով այդ հրապարակումներին, պարոն Բագրատյանն ասաց, որ իրեն ճանաչող մարդիկ կհավաստեն, որ իր պետական կառավարման տարիներին ինքը նման բաներով չի զբաղվել: «Դա բացարձակ ապատեղեկատվություն է, տիպիկ սե PR: Սա հարիր է հայ հանրությանը: Զսպվածությունն ու կոռեկտությունը կարող է շատ ավելի լավ արձագանք ունենալ մեր հանրության մոտ, քան հրապարակումներ անելով երեւույթների մասին`չունենալով հստակ տեղեկատվություն»:
Ինչ մնում է ՏԻՄ ընտրությունների ժամանակ եղած ծեծկռտուքի միջադեպին, Բագրատյանն ասաց. «Այն ժամանակ հայտարարել եմ, հիմա էլ կրկնում եմ`եղել է լարվածություն, եղել են որոշակի երեւույթներ՝ ընտրական օրենսգրքում չտեղավորվող, բայց միջադեպը հարթվել է, որովհետեւ չեն եղել փաստեր եւ ապացույց, քրեական գործ հարուցելու: Դա շահարկել, որ ասենք մի տասը-տասնհինգ տարի առաջ նման դեպք է, չեմ կարծում, որ ճիշտ է: Նպատակը ո՞րն է: Եթե ցանկանում ենք իրար սեւացնել, փնովել`խնդրեմ, բայց խոսում ենք որ հին ազգ ենք, մշակույթ ունեցող…ու դրա հաջորդ պահին վիրավորում ենք միմյանց`առանց որեւէ փաստ ունենալու»:
Բագրատյանն այդ հրապարակումների ետեւում կանգնածներին քաղաքական դեմքեր չի համարում, այլ «ավանտյուրաների սիրահար», բայց այդ ճանապարհն, ըստ նրա, որեւէ տեղ չի տանում: Բագրատյանը չի պատրաստվում դատական պատասխանատվության կանչել այդ հրապարակումների հեղինակներին կամ լրատվամիջոցներին:
«Ժառանգության» այն ներկայացուցիչներին, ովքեր հայտարարում են, որ ԲՀԿ-ն կաշառք է բաժանում եւ ՀՀԿ-ի համար է աշխատում, ԲՀԿ պատգամավոր Վահան Բաբայանը համարում է «անլուրջ մարդիկ» ու առաջարկում է դիմել համապատասխան մարմիններին. «Եթե փաստեր չունեն, անիմաստ խոսել, մարդկանց վարկաբեկել, ուղղակի չի կարելի: Թե՞ Րաֆֆի Հովհաննիսյանն ու իր կուսակցությունը չկարողացան քաղաքի նախընտրական կամպանիայում իրենց հույսերն արդարացնել, արդեն փորձում են ԲՀԿ-ի՞ վրա ցեխ շպրտել: Սա անհարիր մոտեցում է: Բայց եթե օդի մեջ ասում են, որ ԲՀԿ-ն փող է բաժանում, դա մոտեցում չի: Իրենց պռավալը ուզում են բարդել ուրիշների վրա, մի կուսակցության վրա, որը ԲՀԿ-ն է, բարձր վարկանիշ ունի եւ միակ այլընտրանքային ուժն է, որը հնարավորություն ունի հաղթելու եւ Երեւանում իշխանություն ձեւավորելու»:
Կարդացեք նաև
Նելլի ԳՐԻԳՈՐՅԱՆ
