Ըստ Զոհրաբ Մնացականյանի՝ Ասոցացման պայմանագիրը համընկնում է մեր ներքին բարեփոխումների գաղափարախոսությանը:
Ինչպես հայտնի է, Հայաստանը հույս ունի ստորագրել ԵՄ Ասոցացման համաձայնագիրը մինչեւ նոյեմբեր՝ Վիլնյուսում կայանալիք Արեւելյան գործընկերության գագաթաժողովը եւ մինչ տարեվերջ Խորը եւ համապարփակ Ազատ առեւտրի գոտու ստեղծման մասին համաձայնագրի շուրջ բանակցությունները ավարտին հասցնել: Մեր հասարակությունը թերեւս հստակ չի գիտակցում այս երկու համաձայնագրերի կարեւորությունը, եւ դեռեւս այնքան տեղեկացված չէ, թե ինչ փոփոխություններ են սպասվում մեր առօրյայում՝ վերոնշյալ համաձայնագրերի կիրառման արդյունքում։
«Առավոտ»-ի հետ բացառիկ հարցազրույցում Հայաստանի արտաքին գործերի նախարարի տեղակալ, ԵՄ-ի հետ Ասոցացման համաձայնագրի գլխավոր բանակցող Զոհրաբ Մնացականյանը, անդրադառնալով համաձայնագրերի կարեւորությանը եւ հարցին, թե մեր հասարակությունը երբ կզգա՞ փոփոխությունները համաձայնագրերի ընդունումից հետո, նկատեց, որ դա մի հարց է, որին պետք է շատ նուրբ վերաբերվել:
Կարդացեք նաև
«Սա երկրում ընթացող բարեփոխումների գործընթացի մաս է, բայց մենք ոչ թե զրոյից ենք սկսում, այլ տրամաբանական շարունակությունն է այն ամենի, ինչը մենք արել ենք 22 տարի: Դա մենք ենք ցանկանում, մեզ համար է, ոչ թե ԵՄ-ի: Ինչպե՞ս են այդ փոփոխությունները կիրառվելու: Եթե ասենք, որ արդեն 2018-ին ամենը փոխված կլինի՝ իհարկե ոչ: Ասոցացման պայմանագիրը նաեւ համընկնում է մեր ներքին բարեփոխումների գաղափարախոսությանը: 2001թ., երբ մենք դարձանք Եվրոպայի Խորհրդի անդամ՝ մեզ մոտ ժողովրդավարության, մարդու իրավունքների եւ օրենքի գերակայության ամբողջ համակարգը չդարձավ լավագույնը եւ ամեն ինչին համապատասխան արդեն 2002-ին։ 2013-ին մենք դեռ բազմաթիվ ուղղություններով աշխատանքներ ենք տանում եւ մեր հասարակության մեջ դեռ կան խնդիրներ քաղաքական, հասարակական դաշտում, որոնք վերաբերվում են տարբեր ոլորտների: Բայց նաեւ պետք է ընդունենք, որ 2001 եւ 2013 թվականների Հայաստանները արդեն տարբեր Հայաստաններ են: Դա եղել է եվրոպականացում՝ մեր զարգացման ճանապարհին։ 1991-ին, երբ մենք անկախություն հռչակեցինք, ընդունեցինք Սահմանադրություն՝ ամրագրեցինք, որ մենք ցանկանում ենք լինել ժողովրդավարական, իրավական, ազատ շուկայական երկիր: Ի՞նչ տիպի ժողովրդավարական ու տնտեսական համակարգեր ենք ցանկանում: Ասոցացման պայմանագիրը դառնում է նոր հանգրվան, նոր հիմք, որտեղ այդ բարեփոխումները իրենց տրամաբանությունը շարունակում են նոր ընթացքի մեջ»,- նշեց Հայաստանի արտաքին գործերի նախարարի տեղակալ Զոհրաբ Մնացականյանը:
Էմմա ԳԱԲՐԻԵԼՅԱՆ
Հայաստանի արտաքին գործերի նախարարի տեղակալ, ԵՄ-ի հետ Ասոցացման համաձայնագրի գլխավոր բանակցող Զոհրաբ Մնացականյանի հետ հարցազրույցն ամբողջությամբ կարող եք կարդալ վաղվա տպագիր «Առավոտ»-ում:
