«Բարեւ Երեւան» կուսակցությունների դաշինքի անդամ Դանիել Իոաննիսյանը ապրիլի 26-ին եւ 29-ին բազմաթիվ ընտրախախտումների մասին հաղորդումներ է ներկայացրել ՀՀ Կենտրոնական ընտրական հանձնաժողով: Խախտումների մեծամասնության հեղինակը ՀՀԿ-ն է, սակայն կան նաեւ ԲՀԿ-ի, ՕԵԿ-ի, ոստիկանության, մարզպետարանների եւ այլ մարմինների կողմից կատարված խախտումներ: Հիմք ընդունելով այն, որ ՀՀԿ-ի խախտումների քանակն ու մասշտաբն այնպիսին է, որ դրանք անխուսափելիորեն ազդեցություն կունենան մայիսի 5-ի ընտրությունների վրա, «Բարեւ Երեւանի»-ի անդամը ԿԸՀ-ից պահանջում է Ընտրական օրենսգրքի սահմանած ընթացակարգով ընտրապայքարից հանել ՀՀԿ-ին:
Այսօր ԿԸՀ-ն արտահերթ նիստի ժամանակ քննեց Իոաննիսյանի հայցը, ԿԸՀ նախագահ Տիգրան Մուկուչյանն ասաց, որ Իոաննիսյանի առաջին դիմումում ապացույցները չեն վկայակոչվում, ներկայացվածներից ութը վերաբերվում են քարոզչական նյութերին, որոնց հիման վրա հանձնաժողովն իրականացրել է ստուգումներ, պարզել, որ խախտումներ չկան, դրանք ստուգման պահին վերացված են եղել:
Ըստ Մուկուչյանի՝ Իոաննեսյանի երկրոդ դիմումը նախորդից չի տարբերվում, այնտեղ նշված է, որ ՀՀԿ-ի, ԲՀԿ –ի եւ ՕԵԿ-ի դեմ պետք է կիրառել վարչական վարույթ, նյութերն ուղարկել իրավապահներին, դիմել դատարան: Ընդհանուր առմամբ Իոաննեսյանը երկու դիմումներով ներկայացրել է 22 փաստ, որոնց Մուկուչյանը հետեւյալ կերպ արձագանքնեց. «Դիմում եք բերել ԿԸՀ, որ ի՞նչ անեք, վկայակոչում եք մի կայքի տեղեկություն, իսկ մեր ստուգելու ժամանակ այն արդեն տվյալ կայքում չի եղել, ֆոտոապացույցները եւս չեն համապատասխաբում իրականությանը…»: Այս կապակցությամբ Իոաննեսյանը նշեց՝ «Ես չէի տեսել, որ այդ նյութը կայքից հանվել է, չնայած նյութը դրվելու պահին գրված էր, որ դեպքը տեղի է ունեցել այդ պահին…»:
Որքան էլ որ «Բարեւ Երեւանի» անդամը փորձեց բացատրել՝ Մուկուչյանը հիմնավոր չհամարեց Իոաննեսյանի փաստարկները, նույնիսկ այն, որ լուսանկարներում հստակ երեւում է, որ տրցակով թռուցիկներ են բաժանվում խանութի ներսում, ինչի հետ կապված ինքն իր պարտքն է համարում հայտնել:
Կարդացեք նաև
Բողոքում տեղ գտած այն հարցի առնչությամբ էլ, թե ոստիկանը քաղաքացիական հագուստով լուսանկարել է «Բարեւ Երեւանի» ակցիաների մասնակիցների դեմքերը, Մուկուչյանը հարցրեց՝ «Իսկ ի՞նչ գիտեք, որ նա ոստիկան է», Իոաննեսյանն էլ պատասխանեց, որ նրան տեսել է ոստիկանական համազգեստով, այլ ակցիայի ժամանակ, բացի այդ՝ ոստիկանի այդ քայլը Իոաննեսյանը որակեց հոգեբանական ճնշում. «Ես չեմ տեսել, որ որեւէ իշխանական ուժի հավաքին գան քաղաքացիական հագուստով ոստիկաններ եւ լուսանկարեն մարդկանց»:
ԿԸՀ-ն որոշեց, քանի որ Իոաննեսյանը հրաժարվեց իր առաջին դիմումից, ապա ՀՀԿ-ի ընտրական ցուցակի գրանցման ուժը կորցրած ճանաչելու պահանջի մասով վարչական վարույթը՝ կարճել, այլ պետական մարմիններն դիմելու կամ նյութեր ուղարկելու պահանջների մասով՝ մերժել, ՀՀ ընտրական օրենսգրքի պահանջների խախտում չհանդիսացող հանգամանքների մասով՝ դիմումը համարել առարկայազոր, վերացված խատումների, ինչպես նաեւ իրավունքների իրացմանը խոչընդոտող հետեւանքների չհանգեցնող հետեւանքները համարել վերացված:
Որոշումը կարող է բողոքարկվել:
Եվա ՀԱԿՈԲՅԱՆ
