Ճարտարապետների միության նախագահ Մկրտիչ Մինասյանն այսօր «Վարկած» մամուլի ակումբում խոսեց «Հերթը «Զվարթնոցը» քանդելո՞ւն է հասել» թեմայի շուրջ:
Նա նշեց, որ կան բաներ, որոնք չի կարելի անել: Նախկինում նման խոսակցություն չի եղել, որ օդանավակայանը պետք է քանդել: Մի գուցե այսօրվա պայմաններին չի բավարարում, բայց քանդելու մասին խոսք անգամ չկա. «Բայց նման բան կա. եթե շենքը վաճառվում է սեփականատիրոջը` ինչ պայմաններ էլ ուզում է լինի, վերջում հայտնվում է վտանգավոր եզրի վրա` այսինքն սեփականատերը կա’մ չուզենալով պահպանել այն ամենը, ինչ որ այսօր կա, կա’մ էլ ավելորդ համարելով, իր առաջին ցանկությունը լինում է քանդելը: Ճիշտ է, բաներ կան պետք է քանդել, որոնք արժեք չունեն, բայց նման շենքը արժեք ունի: Ստանալ միութենական մրցանակ այդ շենքի համար՝ շատ դժվար էր, բայց նա ստացել է: Մյուս կողմից էլ Սովետական շրջանի մոդեռնիստական ստեղծագործությունների շարքին է պատկանում, որի մասին նշվել է Վիեննայում եղած ճարտարապետների կոնգրեսում»:
Ճարտարապետն ասաց, որ առանց նախագծային փաստաթղթերի կատարվող յուրաքանչյուր շինություն համարվում է անօրինական: Եվ այս դեպքում, ոչ ոք չի ստուգել՝ ի՞նչ է կատարվում` մանավանդ, պատմամշակութային արժեք ունեցողների մասին է խոսքը: Օրենքները մենք պետք է պահպանենք. «Քաղաքը զարգացող օրգանիզմ է, դրա համար անհրաժեշտ է շատ նուրբ մոտենալ յուրաքանչյուր հարցի: Եվ այդ հարցերի տակ դրված է մի փաստաթուղթ` Երևանի գլխավոր հատակագիծը և շեղումներ այդտեղ չլինեն: Իսկ մեզ մոտ ամեն ինչ ծագում է այդ շեղումներից: Մի փոքր շեղում լինում է մի տեղում, այդ շեղումի վրա արդեն գումարվում է մեկ այլը, սեփականատերերը տեսնում են և ասում, եթե կարելի է, ապա ինչո՞ւ ինձ էլ չի կարելի: Մեկ սխալը բերում է շղթայական սխալների»:
Նա նաև հավելեց. «Վերջին հաշվով վերջում պետությունն է տնօրինում ամեն ինչը: Կառավարական շինությունները պատկանում են պետությանը, և պետությունը երբեմն հնարավոր է նման որոշումներ կայացնի: Բայց ես հաստատ համոզված եմ, որ վաղը մյուս օր այնտեղ խնդիրներ են առաջանալու: Անզեն աչքով էլ երևում է, որ դա հյուրանոց դարձնելու դեպքում լրացուցիչ փոփոխություններ կլինեն, որը ցանկալի չէ: Այդ շենքը պատմամշակութային արժեք է ներկայացնում և համալիրի մեջ ընդգրկված է: Առանց փոփոխությունների՝ այն չի կարող որպես հյուրանոց գոյություն ունենալ»:
Կարդացեք նաև
Մկրտիչ Մինասյանը հայտնեց իր ցանկությունը, որ բոլոր կուսակցությունները, որոնք թեկնածուներ ունեն, իմանան, որ մի բան կա. ցանկություն ունենալը լավ է, բայց այս իրավիճակից դուրս գալու միակ պայմանը օրենքները չխախտելն է:
Արմինե Համբարձումյան
