ՀԱԿ փոխնախագահ Լեւոն Զուրաբյանը ծիծաղելի համարեց ՀՀ ոստիկանապետ Վլադիմիր Գասպարյանի արձագանքը ilur.am-ի լրագրողի վրա հարձակման դեպքի առիթով:
«Ռեժիմը լավ գիտի, ով է իր գերեզմանափորը: Դա լինելու է ՀԱԿ-ը: Իրենց համար միակ վտանգը այս դիմադրության շարժումն է, որը պահպանել է պետական կառավարման վերաբերյալ դեմոկրատական պատկերացումները եւ պատրաստվում է կիրառել Հայաստանում իշխանության գալուց հետո: Կատաղի կդիմադրեն դրա համար:
Մեզ համար ծիծաղելի արձագանք է: Եթե ոստիկանությունը ընդունում է, որ տեղի է ունեցել հանցագործություն, որին չեն արձագանքել ներկա ոստիկանները, այ հենց այս ծառայողական քննության փաստի արդյունքով ընդունել են, որ նման դեպք է տեղի ունեցել, ինչո՞ւ նույն ոստիկանությունն էլ չի զբաղվում ծեծի հեղինակին պատժելու գործով: Պարզ է, որովհետեւ ՀՀԿ ավագանու թեկնածու է, բոլորը գիտեն, բայց ոչինչ չի արվում: Այսինքն, ոստիկանությունը զբաղված է այս հանցագործությունը կոծկելով, փորձում է ՀՀԿ-ին հեռու պահել այս հանցագործության հետեւանքներից: Վովա Գասպարյանը եւ ոստիկանությունը ստանձնել են ոչ թե հասարակական կարգի, օրենքի պահպանման , այլ Սերժ Սարգսյանին, այս ռեժիմին հրեշտակ պահապանների գործառույթը: Նրանց պահում են որպես Սերժ Սարգսյանի եւ նրա վարչախմբի անվտանգության ծառայություն»,- այսօր ՀԱԿ կենտրոնական գրասենյակում ասուլիսի ժամանակ ասաց պարոն Զուրաբյանը:
Հարցին, հնարավո՞ր է` լրագրողի նկատմամբ բռնություն կիրառած ավագանու անդամ, ավագանու թեկնածու Աշոտ Պապայանին` «Տուռբոյին» ընտրություններից առաջ չեն պատժում` թույլ տալով նրան աշխատել ՀՀԿ-ի օգտին եւ պատիժը տան ընտրություններից հետո, պարոն Զուրաբյանն ասաց. «Ինչ թողնենք, այն էլ կանեն: Շատ բան կախված է մեր ճնշումներից եւ պահանջկոտությունից: Եթե ժողովուրդը ակտիվ լինի ու հազարներով հանրահավաքի գան, ռեժիմը կնահանջի»:
Կարդացեք նաև
Արփինե ՍԻՄՈՆՅԱՆ
