Այսօր «Հայելի» ակումբում «Ազգային անվտանգություն» կուսակցության նախագահն անդրադառնալով հակակոռուպցիոն կազմակերպությունների գործունեությանը, ասաց. «Այն խնդիրները, որոնք առնչվում են Հայաստանին, պետք է լուծվեն Հայաստանում: Պետք չէ նամակ գրել ռուսաց թագավորին, պետք է նամակ գրել հայոց թագավորին, հայոց հանրությանը: Ժամանակն է, որ մեր պետական այրերը հասկանան մի բան, Հայաստանին վերաբերվող հարցերն այստեղ են լուծվում, իսկ եթե նրանք դրսում են ինչ որ բան փնտրում, ուրեմն դա Հայաստանի հետ կապ չունի»:
Իսագուլյանը գտնում է` բոլոր այն մարդիկ, որոնք մեր խնդիրները փորձում են երկրից դուրս հանել, ասենք` Պուտինին նամակ գրել, դրանք անլուրջ մարդիկ են ու վարկաբեկում են երկիրը:
Այն, որ ընտրություններից առաջ ուժերը գնում են Հայաստանից դուրս, հանդիպում այլ նախագահների հետ, Իսագուլյանը նշեց, որ դրանք զուտ պետական այցեր են, ու դրանց չպետք է այլ աստառ տալ:
«Եթե կազմակերպությունը հակակոռուպցիոն է, հավաքում է փաստեր, ապա այդ փաստերը պետք է իրազեկել այդ խնդիրների մասին: Օրինակ Գառնիկ Մարգարյանը չի ասում կոնկրետ փաստեր, այսօր մոդայիկ է դարձել Ռոբերտ Քոչարյանի անունը տալը, բայց դա փաստ չէ, որովհետեւ վերցնել մարդու հայտարարագիրը ու ասել, թե սա փաստ է, պետք է նրան դատի տալ՝ սխալ է: Իհարկե ես չեմ ասում՝ նա այդ ամենը արդար ճանապարհով է վաստակել: Այն կազմակերպությունները, որոնք ուղղակի այսպես են վարվում, դառնում են անլուրջ կազմակերպություններ: Չեմ ասում, որ կոռուպցիա չի եղել, թալան չի եղել, բայց կան հակակոռուպցիոն կազմակերպություններ, որոնց անդամներին ես չեմ ճանաչում: Իհարկե, կան նաեւ լուրջ կազմակերպություններ, որոնք հարմար պահի են սպասում, որ ներկայացնեն իրենց փաստերը: Պետք է սպասել, մինչեւ համապատասխան միջավայրը կձեւավորվի: 2015 թվականի սեպտեմբերի 21-ից հետո շատ բան կփոխվի»,-նշեց Իսագուլյանը:
Կարդացեք նաև
Բանախոսի խոսքով`ինքը երբեք իրեն թույլ չի տա երկրին վերաբերող հարցերի լուծումը գտնել դրսում`«դիմում ենք Հաագա դատի տալիս մեր նախագահներին, գնում ենք Մոսկվա հաղթանակ բերելու, պետք չէ նման բաներ անել, դա սխալ է»:
Եվա ՀԱԿՈԲՅԱՆ
