ՕԵԿ քաղաքապետի թեկնածու Արմեն Երիցյանը լուրջ չի վերաբերում «GALLUP»-ի հարցումներին: Այսօր անդրադառնալով հարցումների արդյունքներին՝ ասաց. «Մեկը մեկին սիրում կամ չի սիրում ինչ-որ տոկոսներ է ասում, իր խնդիրն է, թող այդ տոկոսներով բավարարվի, այդ տոկոսներն ում ուզում է ներկայացնի բացի Արմեն Երիցյանից: Ազգաբնակչության հետ հանդիպումներից տեսնում եմ ՝ ով ինչքան տոկոս ունի: Ի՞նչ է նշանակում կարգախոս, սովորական բառ է, մեկը ասում է բարեւ, մյուսը բարի լույս, մեկը՝ եսիմ ինչ: Դա չի նշանակում՝ մեկինը լավն է, մյուսինը վատն է: Այդ տոկոսային հարաբերությունների տակ մտնելուց վատ բան չկա: Ինձ հավատ չեն ներնչում «Գելափի» արդյունքները: Թող մի օր գան ինձ հետ հանդիպման, թե չէ իրենց կաբինետներում նստած երկու հարցում են անում ու եզրակացություն անում: Կարող է նաեւ նախապես պատվիրված լինեն, չեմ կարող ասել, բայց որ ես չեմ պատվիրել՝ հարյուր տոկոս»:
Պարոն Երիցյանը նորից կրկնեց, թե այն կարծիքին չէ, որ քաղաքում ոչինչ չի արվել. «Իսկական տղամարդն այն է, որ ասում է՝ մարդիկ արել են: Կարո՞ղ ենք ասել ոչ մի բան չեն արել, մարդիկ աշխատել են իրենց գյորա: Ես առաջարկում եմ իմ աշխատաոճն ու ասում եմ՝ ես կարող եմ անել ավելին… Իմ ավելին՝ ավելի ավելի է»:
Պարոն Երիցյանն անդրադարձավ նաեւ այն խոսակցություններին, թե ինքը մնալու է արտակարգ իրավիճակների նախարարի իր պաշտոնում եւ միայն կուսակցությանն օգտակար լինելու համար է քաղաքապետի թեկնածություն դրել. «Բա ինչի՞ համար եմ եկել էսքան չարչարվում, կարո՞ղ է բան ու գործ չունեմ: Ձեզ վրա այդպիսի տղամարդու տպավորությո՞ւն եմ թողնում, որ կարող են ինձ հանձնարարել ես գամ ելույթներ ունենամ, գնամ: Եթե ընտրվեմ քաղաքապետ, լինելու եմ ձեր քաղաքապետը»:
Նշենք, որ ըստ «GALLUP International association»-ի անցկացրած վերջին հարցումների՝ եթե առաջիկա կիրակի օրը Երեւանի ավագանու ընտրությունները լինեն,երեւանցիների 41,5 տոկոսը ձայնը կտա ՀՀԿ-ին, 14,5 տոկոսը՝ «Բարգավաճ Հայաստան» կուսակցությանը։ «Բարեւ, Երեւան» դաշինքին կնախընտրեն ընտրողների 7,9 տոկոսը, ՕԵԿ-ին՝ 3,7 տոկոսը, ՀՅԴ-ին՝ 3,1 տոկոսը, ՀԱԿ-ին՝ 2,9 տոկոսը, «Առաքելությանը»՝ 0,3 տոկոսը։
Կարդացեք նաև
Հարցման մասնակիցների 57, 6 տոկոսը քաղաքապետի պաշտոնում տեսնում է գործող քաղաքապետ Տարոն Մարգարյանին, 5,9 տոկոսը Վարդան Օսկանյանին , Արմեն Երիցյանին՝ 3, 8 տոկոս, Արմեն Մարտիրոսյանին՝ 3,7 տոկոս, Վահագն Խաչատրյանին՝ 2,3 տոկոս, Արմեն Ռուստամյանին՝ 1,8 տոկոսը, Գուրգեն Արսենյանին՝ 1, 7 տոկոս, Մեսրոպ Առաքելյանին ՝ 0, 1 տոկոսը:
Արփինե ՍԻՄՈՆՅԱՆ
