Երևանի ավագանու ԲՀԿ ցուցակի 2-րդ համար Գուրգեն Արսենյանը «Առաջին լրատվական»-ին տված հարցազրույցում ասաց, թե համաձայն է ոստիկանապետ Վովա Գասպարյանի տեսակետի հետ, որ քայլելը, վազելը օգտակար են առողջության համար: Հիշեցնենք, որ Ծիծեռնակաբերդում ԲՀԿ առաջնորդ Գագիկ Ծառուկյանին ոստիկանները թույլ չէին տվել գնալ պաշտոնյաների համար նախատեսված ճանապարհով, իսկ նախօրեին ոստիկանապետ Վովա Գասպարյանը հայտարարել էր, թե ոստիկանները շատ ճիշտ են վարվել, և որ քայլելն օգտակար է առողջության համար:
– Պարոն Արսենյան, ոստիկանապետը հայտարարություն արեց Ծիծեռնակաբերդում Գագիկ Ծառուկյանի միջադեպի հետ կապված` ասելով, որ ոստիկանները շատ ճիշտ են արել, և որ քայլելը օգտակար է առողջությանը: Ո՞րն է Ձեր մեկնաբանությունը դրա վերաբերյալ:
– Ինչի՞ վերաբերյալ, որ քայլելն օգտակար ա առողջությա՞նը: Կիսում եմ նմանատիպ մոտեցումը, որովհետև քայլելը, վազելը, սպորտով զբաղվելը օգտակար է առողջությանը:
– Այսինքն` Դուք համամի՞տ եք, որ ոստիկանները ճիշտ են արել` փակելով Գագիկ Ծառուկյանի ճանապարհը:
Կարդացեք նաև
– Ոստիկանները Գագիկ Ծառուկյանի ճանապարհը չեն փակել: Նմանատիպ միջադեպ, որի մասին թմբկահարեցիք բոլոր լրատվամիջոցներով Եղեռնի օրը, համարում եմ, որ դա արդեն ծանծաղության դրսևորում ա, մարդկային ծանծաղության, որ Եղեռնի օրը զբաղված են մարդիկ նրանով, ինչ որ վերաբերվում ա հարգանքի տուրք մատուցել այն մարդկանց, ովքեր որ զոհվել են, և ոչ թե, ասենք, մի հատ թեթև միջոցառման կամ միջադեպի, որը որ համարում եմ, միջադեպ չի էլ եղել, դարձնել ինտերնետի ու լրատվական կայքերի սենսացիան: Պրոբլեմ ա արդեն երկրում:
– Պարոն Արսենյան, նույն Գագիկ Ծառուկյանի խոսնակը` Իվետա Տոնոյանը, հայտարարություն էր տարածել, որ ոստիկանությունը պետք է պարզաբանում տա միջադեպի հետ կապված:
– Ես իմ կարծիքն ասացի ընդհանրապես էդ միջադեպի հետ կապված և էդ օրվա խորհրդի հետ կապված: Դա իմ անձնական տեսակետն ա, որը որ ես պնդում եմ:
– Այսինքն` ոստիկաններն իրենց սխալ չե՞ն պահել:
– Ոստիկանները գտնվում էին ոստիկանական գործառույթների շրջանակում, մենք էլ որպես մարդիկ, որ գնացել էինք ծաղիկ դնելու Եղեռնի զոհերի հուշահամալիրին, գտնվում էինք մեր գործառույթների շրջանակում:
– Ձեր կարծիքով` ոստիկանապետի հայտարարությունը տեղի՞ն էր, որ ճիշտ է վարվել ոստիկանությունը:
– Գուրգեն Արսենյանն իր տեսակետն է ասում, ոստիկանապետն իր տեսակետն է ասում, ԵՄ գլխավոր քարտուղարն իր տեսակետն է ասում, ՆԱՏՕ-ի գլխավոր քարտուղարն իր տեսակետն է ասում: Ամեն մեկն իր տեսակետն ասելու իրավունք ունի:
– Փաստորեն, այսօր Գագիկ Ծառուկյանը չի հանդիսանում այլևս պաշտոնյա, և նրա դեմ միջոցներ են կիրառվում:
– Գագիկ Ծառուկյանը հանդիսանում է Հայաստանի ԱԺ իր մեծությամբ երկրորդ խմբակցության ղեկավարը:
– Սակայն ոստիկանությունը, փաստորեն, տարանջատում է նրան մյուս պաշտոնյաներից:
– Ոստիկանությանը ուղղեք ձեր հարցերը: Եթե տարանջատման վերաբերյալ գրավոր կամ բանավոր հրահանգ կա, ցանկալի կլինի, որ ոստիկանությունն ասի դրա վերաբերյալ, թե ինչը ինչից է տարանջատում, երբ ու ոնց է նայում:
«Ժամանակ»
