«Զարկերակ՚ մամուլի ակումբում այսօր GALLUP International association-ի հայաստանյան ներկայացուցչության տնօրեն Արամ Նավասարդյանը ներկայացրեց GALLUP International association-ի հետազոտությունների արդյունքները, որոնք վերաբերում են Երևան քաղաքի հիմնախնդիրներին:
Ապրիլի 18-21-ը կատարված հետազոտությունն արդեն երրորդն է: «Երևան քաղաքի վերջին 1,5 տարվա փոփոխությունները հարցվածների 13 տոկոսը գնահատում է լիովին դրական, նախկին 7 տոկոսի փոխարեն: «Ավելի շուտ դրական» պատասխանը տվել է քաղաքացիների 6.3 տոկոսը: Ընդհանուր առմամբ` քաղաքացիները դրական են գնահատել փոփոխութունները, իսկ 16 տոկոսը դժգոհ են փոփոխություններից, ինչի վրա պետք է ուշադրություն դարձնեն իշխանությունները: Քաղաքացիների կողմից որպես դրական փոփոխություններ են ներկայացվել կանաչապատումը (47 տոկոս), նստարանների տեղադրումը, քաղաքի արտաքին տեսքի բարելավումը, բակերի բարեկարգումը, լուսավորությունը: Այսինքն, այն փոփոխությունները, որոնք իրականացվել են նախընտրական փուլում, շեշտադրվել են թիմերի կողմից, եւ մարդկանց հետաքրքրությունը քաղաքային իշխանությունների հանդեպ բարձրացել է»,-հայտնեց Արամ Նավասարդյանը:
Նրա փոխանցմամբ` որպես ընդհանուր կարգի խնդիրներ հարցվողներն առանձնացրել են գործազրկությունը, արտագաղթը, կրթական եւ բուժհաստատությունների վատ վիճակը, իսկ Երևանի վերաբերյալ` հասարակական տրանսպորտի, աղբահանության եւ բնապահպանական խնդիրները:
Ըստ հարցման արդյունքների` քաղաքացիներն առավել շատ ցանկանում են տեսնել սպորտային եւ մշակութային ծրագրերի իրականացում:
Կարդացեք նաև
«Ըստ հարցվածների` պետք է զարգացնել կրթական ոլորտը, զբաղվածությունը, սոցիալական եւ տնտեսական ոլորտը: Իսկ ըստ հիմնական չափանիշների առավել բարձր են գնահատվել Կենտրոնը եւ Ավանը, իսկ ցածր` Էրեբունին, Շենգավիթը, Նուբարաշենը: Համայնքների ճարտարապետական տեսքի գնահատման առումով դրական ցուցանիշ ունի Ավանը, Դավիթաշենը, Կենտրոնը, մինչդեռ խնդրահարույց են Երեբունին, Շենգավիթը եւ Նուբարաշենը»,-տեղեկացրեց Արամ Նավասարդյանը:
Լուիզա ՍՈՒՔԻԱՍՅԱՆ
