«Էրեբունի պլազա» բիզնես կենտրոնի «Էրեբունի» դահլիճում այսօր տեղի ունեցավ «Սիրիահայերի հիմնախնդիրները համակարգող միջգերատեսչական հանձնաժողովի» հերթական նիստը` ՀՀ սփյուռքի նախարարի պաշտոնակատար Հրանուշ Հակոբյանի ղեկավարությամբ:
Սիրիահայերի հիմնախնդիրները համակարգող կենտրոն հասարակական կազմակերպության նախագահ Լենա Հալաջյանը նշեց, որ այսօր Հայաստանում են 3445 սիրիահայ, որից 1237-ը ընտանիքներ են, իսկ 423-ը անհատներ:
ՀՀ էկոնոմիկայի նախարարության ՓՄՁ ԶԱԿ` տնօրեն Վարազդատ Կարապետյանը ներկայացրեց վերջին հինգ ամիսների ընթացքում փոքր և միջին ձեռնարկատիրության զարգացման կենտրոնի կատարած աշխատանքը «Սիրիահայերին աջակցություն» ծրագրի շրջանակներում: Այն սիրիահայերի համար, ովքեր ցանկություն են հայտնել Հայաստանում զբաղվել ձեռնարկատիրությամբ` նրանց համար սահմանվել են հետևյալ պայմանները` մինչև 5 միլիոն դրամ վարկեր և ժամկետը մինչև 5 տարի, տարեկան տոկոսադրույքն էլ 4%. «Այսօր արդեն 12 ձեռնարկություններ սկսել են աշխատել, իսկ մնացածը դեռ կազմավորման ընթացքում են»:
Կարդացեք նաև
ՀՀ սփյուռքի նախարարի պաշտոնակատար Հրանուշ Հակոբյանը հայտնեց իր պատրաստակամությունն այցելել սիրիահայերի ձեռնարկատիրություններ և տեղում տեսնել նրանց կատարած աշխատանքը և որևիցե խնդիր լինելու դեպքում օգնել:
Նոյեմբեր ամսվանից 515 սիրիահայի հետ աշխատանքներ են տարվել զբաղվածության կենտրոնների կողմից, եւ նրանցից 115-ն արդեն գտել են աշխատանք: Կան մարդիկ էլ, ովքեր ներգրավվում են տարբեր ծրագրերի մեջ, բայց ցածր աշխատավարձերի պատճառով հրաժարվում: Հրանուշ Հակոբյանը հավելեց. «Ընդհանուր առմամբ արդեն 700 հոգի աշխատանք են գտել: Բոլոր դեպքերում ինչքան շատ ներգրավենք, այնքան նրանք ուզեն թե չուզեն, նաև կհարմարվեն մեր աշխատանքի, աշխատավարձի չափերին և կսկսեն աշխատել»:
Օրակարգի հարցերից մեկն էլ սիրիահայերի հիմնախնդիրների համակարգող կենտրոն հասարակական կազմակերպության գործունեությունն է: Հրանուշ Հակոբյանը նշեց. «Մենք սիրիահայերին ընդունելու հետ զուգահեռ անմիջապես հասկացանք, որ պետք է ստեղծել ինքնակառավարող մարմին` հասարակական կազմակերպություն, որպեսզի պետական խնդիրները մենք այստեղ նստածներս լուծենք, իսկ ոչ պետական խնդիրները (օգնություն, տարբեր տիպի աջակցություններ, միջազգային կառույցներ, անհատներ, բարերարներ, սնունդ, հագուստ է և այլն) հենց սիրիահայերը որոշեն, թե ովքեր ունեն դրա կարիքը կամ շահառուները՝ ում կարելի է օգնել, դրա համար էլ ստեղծվեց այդ կազմակերպությունը»:
Արմինե Համբարձումյան
