Ընտրությունների թեման ամենաքննարկվողն է հասարակության շրջանում. կարծիքներ, մեկնաբանություններ, վեճեր մինչև անգամ ցույցեր ու ծեծկռտուք: Նախագահի ընտրությունից հետո հաջորդ թեման Երեւանի քաղաքապետի եւ ավագանու ընտրություն է. ոմանք կայացրել են իրենց որոշումը և հստակ գիտեն, թե ում են ընտրելու մայիսի 5-ին, ոմանք էլ՝ չեն որոշել կամ չեն ցանկանում բարձրաձայնել: Ու՞մ են ընտրելու երիտասարդները, փորձել է պարզել «Առավոտ երիտասարդականը»:
«Դեռ չեմ որոշել, բայց երեկ երբ Տարոն Մարգարյանը այցելեց մեր վարչական շրջան, այդ հանդիպումից ես շատ ոգևորվեցի, հիմա ավելի շատ հակված եմ նրան ընտրելուն», – ասում է 19-ամյա Դիանան:
21-ամյա Անի էլ ասում է, որ օրեր առաջ ՕԵԿ-ից մարդիկ էին գնացել իրենց տուն և բուկլետներ տվել. «Ի տաբերություն մյուս մարդկանց՝ չպատռեցի, այլ դարակում դրեցի, բայց իհարկե դա չի նշանակում, թե հենց իրենց կողմնակիցն եմ, բայց նաև չեմ էլ բացառում դա», – ժպտում է նա:
«Դեռ չեմ կողմնորոշվել, չգիտեմ», – ասում է 19-ամյա Քնարիկը:
«Ավելի լավ է բոլորս գնանք Տարոն Մարգարյանին ընտրենք, որ հետո չհուսահատվենք, թե մեր ընտրությամբ չեղավ, – ասում է 23-ամյա Նաիրան, – միևնույն է, մեր քվեն կարևոր չէ, ամեն ինչ արդեն որոշված է»:
«Երկու թեկնածուների միջև եմ տատանվում՝ Վարդան Օսկանյան կամ Տարոն Մարգարյան», – ասում է 21-ամյա Կարենը:
«Նախագահական ընտրությունները ցույց տվեցին, որ ընտրությունների գնալն ընդհամենը ձևական բնույթ է կրում, – կարծում է 23-ամյա Վարդուհին, – դրա համար էլ ևս մեկ անգամ դրանում համոզվելուց հետո, այս ընտրություններին չեմ մասնակցելու, միևնույն է, իմ քվեն ոչ մի որոշիչ դեր ունենալ չի կարող»:
Վարդուհու կողքին էր նաև 21-ամյա Տիգրանը, ով ասաց. «Այդպես ես կարծում, դրա համար էլ ոչինչ չի փոխվի երկրում, – և ավելացրեց, – ես անպայման գնալու եմ ընտրության, ընտրելու իմ իմ ուզած թեկնածուին, իսկ թե ով է նա՝ նախընտրում եմ չասել»:
«Եթե համոզված լինեմ, որ այն ընթացքը, որում հիմա է մեր քաղաքը գտնվում, չի կանգնեցվի՝ կընտրեմ Տարոն Մարգարյանին, նրա հայրն էլ էր երկրին արժանի զավակ, որդին նույնպես», – կարծում է 28-ամյա Հրայրը:
21-ամյա Լիանան ևս այն մարդկանցից է, ով նախընտրում է ժամանակ չկորցնելու ընտրատեղամաս գնալու վրա, ասում է. «Չեմ գնալու ընտրության, որովհետև չեմ հավատում, որ մեր երկրում հնարավոր է արդարություն հաստատել»:
«Փորձել եմ հնարավորինս հետևել բոլոր թեկնածուների ելույթներին, կարծիքներ կազմել ու կատարել իմ ընտրությունը: Ես ուզում եմ, որ գոնե այս անգամ ժողովրդի քվեն հաշվի առնեն, և որ ընտրությունների գնալը միայն պարտականություն չլինի , լինի նաև հույս, որ վաղը մեր ընտրած թեկնածուն է ղեկավարելու, – ասում է 22-ամյա Ֆլորան և հավելում, – իմ թեկնածուն Արմեն Մարտիրոսյանն է»:
Տիգրանուհի Թասլակյան
