Մարքսիստական կուսակցության նախագահ Դավիթ Հակոբյանի համոզմամբ, առանց ԲՀԿ-ի ՀՀԿ-ն ավագանու ընտրություններում հաղթանակ չի ունենա:
«Մի երկու օր առաջ Վարդան Օսկանյանը ընդդիմություն դառնալու կոչ արեց: Երբ խորհում եմ իմ շատ հարգարժան Գագիկ Ծառուկյանի եւ ԲՀԿ-ի մասին, գալիս եմ այն եզրակացության, որ հաճախ կապիտալիստներն ավելի խոհեմ են լինում քան նրանց քաղաքական սպասավորները… Նա երբեք սուր չի բարձրացնի արքունիքի նկատմամբ, բայց արքունիքն էլ պետք է նրա խոհեմությունը եւ համեստությունը ոչ միայն չշահագործի, այլեւ գնահատանքի արժանացնի: Որովհետեւ, երբեմն ինչքան էլ առյուծը լինի ընտելացված, ամեն դեպքում մի անգամվա մռնչոցը կարող է ողբերգական հետեւանքներ ունենալ: Այս մասին, թող լավ իմանան արքունիքում եւ Ծառուկյանին արժանավայել դիրք գրավեն: Համենայնդեպս, առանց Ծառուկյանի ՀՀԿ-ն խորհրդարանական ընտրություններում հաղթանակ չէր տանի»,- այսօր «Փաստարկ» ակումբում ասաց մարքսիստը: Հետո հանուն ազգային կոնսոլիդացիայի ՀՀԿ-ին հորդորեց. «Լավ պատկերացրեք՝ առանց ԲՀԿ-ի քաղաքապետարանի ընտրություններում հաղթանակ չեք ունենա»:
Արփինե ՍԻՄՈՆՅԱՆ
