Այսօր լրագրողների հետ հանդիպման ժամանակ լրագրողները ՀՀ ֆինանսների փոխնախարար Վարդան Արամյանից հետաքրքրվեցին, թե ինչով է պայմանավորված այն հանգամանքը, որ հասարակ քաղաքացին իր մաշկի վրա չի զգում երկրում գրանցված տնտեսական աճը:
Փոխնախարարի խոսքով՝ հասարակ քաղաքացիները իրենց մաշկի վրա կզգան տնտեսական աճը միայն այն ժամանակ, երբ երկրում գրանցվի աշխատավարձերի բարձրացում եւ գործազրկության նվազում:
«Ինչ վերաբերվում է գործազրկությանը, ապա այն 18 տոկոսից հասել է 17.3 տոկոսի, այսինքն՝ ավելի շատ գործազուրկներ աշխատանք են գտել: Աղքատության մակարդակն էլ է որոշակիորեն իջել, բայց աղքատության մակարդակի մասին վերջնական ցուցանիշները մենք կունենանք մի քիչ ավելի ուշ»,- նշեց փոխնախարարն ու հավելեց, որ չարժե հայտարարել, որ ոլորտում չկա բարելավման միտում, քանի որ անցած տարի բարձրացել են նաեւ աշխատավարձերի չափերը:
Փոխնախարարը նորմալ է համարում, որ հանրության մեջ «ամենաաղմկոտ» մարդիկ նրանք են, որոնց սոցիալական վիճակը ծանր է:
Կարդացեք նաև
«Երբ մարդ աշխատանք է գտնում, բոլորին չի հայտարարում՝ տեսեք՝ ես աշխատանք եմ գտել, իմ աշխատավարձը բարձրացրել են»,-ստեղծված իրավիճակը յուրովի բացատրեց ֆինանսների փոխնախարարը:
Աշոտ ԱԹԱՅԱՆ
