Նախագահական վերջին ընտրություններում ընտրակաշառքը նվազագույն չափերի ու մասշտաբների հասավ` ոչ միայն այն պատճառով, որ Տեր-Պետրոսյանն ու Ծառուկյանն իրենց թեկնածությունները չառաջադրեցին, այլև ու հիմնականում այն պատճառով, որ Սերժ Սարգսյանն ու հանրապետականները Րաֆֆի Հովհաննիսյանի հնարավորություններն ըստ արժանվույն չգնահատեցին:
Հնարավոր է` քաղաքապետի ընտրություններում արդեն հանրապետականները Րաֆֆի Հովհաննիսյանի և «Ժառանգության» մրցակցությանը միանգամայն լուրջ վերաբերվեն և այս անգամ էլ սխալվեն:
Ես Ահարոն Ադիբեկյանի հնարավորությունները չունեմ, բայց համարձակվում եմ ենթադրել, որ նախագահական ընտրություններում Րաֆֆի Հովհաննիսյանի ստացած իրական ձայների զգալի մասը բաժին կհասնի «Բարգավաճ Հայաստանին», ՀԱԿ-ին ու ՀՅԴ-ին:
Եվ քանի որ «Ժառանգությանն » էլ, այնուամենայնիվ, ընդդիմության հասանելիք ձայներից որոշակի ձայներ կհասնեն, և քանի որ ՕԵԿ-ին էլ որոշակի տոկոս բաժին կհասնի, Երևանի քաղաքապետի ընտրությունները ոչ թե պարզապես մրցակցային կլինեն, այլև` չափազանց մրցակցային:
Կարդացեք նաև
Եվ ինչքան էլ Տարոն Մարգարյանը գովազդվի ու գովաբանվի, Տարոնի ու հանրապետականների համար չափազանց դժվար է լինելու ցանկալի ու պահանջվող տոկոսն ապահովելը, և պարզից էլ պարզ է, որ ՀՀԿ-ն նախագահական ընտրություններում խնայված միջոցների կրկնապատիկն ու եռապատիկը Երևանի քաղաքապետի ընտրությունների վրա է ծախսելու:
Եվ քանի որ ԲՀԿ-ն նախագահական ընտրություններում ընդհանրապես փող չծախսեց, ԲՀԿ-ն էլ հաստատ մաքսիմալ քանակությամբ միջոցներ կծախսի: Եվ չնայած երկուսն էլ պնդում են թե` ընտրակաշառք չեն բաժանելու, երկուսին անմնացորդ հավատալու դեպքում անգամ վստահ ենք, որ ասֆալտ ու փոխաբերական այլ ընտրակաշառքներ կլինեն, և տրակտորների ու գյուղտեխնիկայի փոխարեն էլ քաղաքային տեխնիկա և այլ բաներ կլինեն:
Բայց ինչքան էլ տրամադրվենք, որ ընդամենը ընտրակաշառքի փոխաբերական ձևերն են եղանակ ստեղծելու, կյանքը և հատկապես մեր կյանքը մեզ ու մանավանդ ընտրվողներին բազմիցս ցույց է տվել, որ նաղդ փողով ընտրակաշառքի դերն ու նշանակությունը ոչ միայն չի պակասել, այլև, ընդհակառակը, ավելացել է: Եվ չնայած շատերն են պնդում, որ վերջին ընտրություններում ընտրակաշառքի չափերն էականորեն պակաս էին, և չնայած շատերը նաև պնդում են, որ վերջին ընտրություններում ընտրակաշառք ստացողները գնացել և իրենց ձայները տվել են հակառակ կողմին, բոլորս էլ հասկանում ենք, որ խոսքը վերաբերում է բացառապես Թումանյանի պատկերով դրամական «կուպյուրներին»: Եվ չնայած մեր ժողովուրդը Թումանյանին շատ է սիրում, այդուհանդերձ, ընտրությունների օրերին նախապատվությունը տալիս է Իսահակյանին ու Սարյանին, և Իսահակյանի ու մանավանդ Սարյանի դեպքերում գնում և ազնվորեն ձայնը տալիս է հենց ընտրակաշառք տվողին, և հատկապես էս անգամ էդպես կանի` ոչ միայն էն պատճառով, որ վերջին ընտրություններից հետո մարդիկ համոզվեցին, որ բացարձակապես կապ չունի` իրենք ում են ընտրել, այլև էն պատճառով, որ ընտրողները նաև տեսան ու համոզվեցին, որ իրենց իրական ընտրյալներն իրենց ստացած ձայների համար կիսատպռատ են պայքարում:
Այնպես որ, ինչքան էլ աջուձախից մեզ համոզեն, որ էս անգամ ընտրակեղծիքների դեմն առնվելու է, առնվազն ընտրակաշառքի մասով էդ լավատեսությունը չենք կարող կիսել:
Ընտրակաշառք կբաժանեն նրանք, ովքեր միշտ են բաժանել: Ընդ որում, կբաժանեն ավելի շատ, քան` նախկինում են այդ արել: Որովհետև Երևանի քաղաքապետի ընտրությունն իսկապես չափազանց կարևոր է:
Տա Աստված` մեր այս ենթադրություններում սխալված լինենք:
Օսկան ՏԱՐՈՆՑԻ
