Րաֆֆի Հովհաննիսյանը Իջեւանում, «Շանթ» սրճարանում իր կուսակիցների եւ համակիրների հետ հանդիպման ժամանակ հայտարարեց, որ Իջեւանի քաղաքապետարանը եւ Տավուշի մարզպետարանը հանդիպման համար դահլիճ չեն տվել: Հանդիպումը կայացավ սրճարանում:
Նա ասաց, որ փետրվարի 18-ից մինչեւ ապրիլի 9-ը միասին մի հանգրվան ապրեցինք, այն անձնուրաց էր, համազգային, համաքաղաքացիական եւ հավելեց.
«Ապրիլի 9-ին բյուրեղացավ դաշտը: Ով եկավ հրապարակ արյուն հեղելու համար, քաղաքացի լիներ այդ մարդը կամ իշխանավոր, կարծեցյալ ընդդիմությունից, թե մեկ ուրիշ աղբյուրից, ով ուզում էր, որ հաջորդ օրը Հայաստանում լիներ հարյուր հատ հուղարկավորություն,ինքը չտեսավ այդ, որովհետեւ մենք թույլ չտվեցինք: Մենք մեր բոլոր սխալներով հանդերձ՝ ճշմարիտ էինք: Ես անձամբ՝ ձեզ հետ միասին, թույլ չտվեցի, որ մեր հաղթանակից հետո իրենք խլեն մեզնից այդ հաղթանակը, եւ մյուս օրը Հայաստանով մեկ լիներ հարյուր հատ թաղում, եւ մեկս մյուսին մեղադրեինք: Դաշտը բյուրեղացավ այն առումով, որ նրանք, ովքեր սպասում էին իրենց մութ նպատակների համար չարաշահելու ժողովրդի հաղթանակը, ներկայանալու որպես մարգարեններ եւ Քրիստոսներ, հիմա ժամանակն իրենցն է»:
Ր. Հովհաննիսյանը հայտարարեց, որ որ այս իշխանությունը 5 տարի չի դիմանալու:
Ոսկան ՍԱՐԳՍՅԱՆ
