Ինչպես ավելի վաղ հայտնել էինք, այսօր Պուշկինի 25 շենքի դիմաց մի խումբ քաղաքացիներ լրագրողներին հայտնեցին շենքի պահպանության շուրջ իրենց մտահոգությունը: Շենքի երկու կողմերում հյուրանոցներ են կառուցվելու` վտանգելով հարակից պատմական շինությունների գոյությունը:
«Պետական կարիքների զոհեր» հ/կ նախագահ Սեդրակ Բաղդասարյանը, որը Բյուզանդի փողոցի նախկին բնակիչ է, նշեց, որ Պուշկինի 25 շենքը երևանցիների համար թանկ է, քանզի Թամանյանի կողմից նախագծված բնակելի շենք է, որտեղ նախկինում Բրյուսովի անվան ինստիտուտն է եղել: «ՀՀ անկախացումից հետո տասնյակ քաղաքապետեր ունեցանք: 2000թ-ից ի վեր նրանք հաջողությամբ կարողացան Երևանում պատմամշակութային 30 հուշարձան քանդել: Իսկ մինչ այդ ոչնչացվեց Սևան հյուրանոցը: Զարմանալի փաստ` հյուրանոցը քանդում են, փոխանակ վերականգնեն, հիմա էլ պատմամշակութային հուշարձանի վրա նորից ցանկանում են հյուրանոց կառուցել: Այս փաստը բոլորին պետք է մտահոգի: Այսօր Երևանի պատմության մասին ենք խոսում, բայց վաղը մյուս օրը մեր երեխաներին ի՞նչ պետք է ցույց տանք՝ Հյուսիսային պողոտայի անճոռնի շենքե՞րը: Վաղը մյուս օրը ոչ մեկը չի հիշելու մեր մեծերին, օրինակ` Աֆրիկյաններին»:
Բաղդասարյանի խոսքով. «Երևանում շատ քիչ պատմամշակութային հուշարձաններ են մնացել: Առ այսօր հուշարձանների վերականգման հարցում ոչինչ չի արվել, ավելին, տեսնում ենք, թե գումարներն ինչի վրա են ծախսվում` պինգվիններ եւ եղջերուներ են «տնկում»: Հիշեցնենք, որ քաղաքապետարանի աշխատակազմի արտաքին ձեւավորման եւ գովազդի վարչության պետ Արազ Բաղդասարյանը նշել էր, որ Երևանը զարդարելու նպատակով օգտագործված միջոցները տոներն անմոռանալի դարձնելու համար են:
Ֆոտոլրագրող Հայկ Բիանջյանը փաստեց, որ քանդված շատ շենքերի քարեր անգամ գոյություն չունեն, իսկ Աֆրիկյանների հանրապետական նշանակության հուշարձանը այսօր համարակալված է, ինչը նույնն է, թե արդեն չկա: «Ասում ենք, որ Երևանը աշխարհի ամենահին քաղաքներից է, բայց իրականում այն չունի պատմություն, պատմական շենքեր»,-հավելեց Բիանջյանը:
Կարդացեք նաև
Լուիզա ՍՈՒՔԻԱՍՅԱՆ
