Քիչ առաջ Գյումրիի ոստիկանությունը ձերբակալել է Հարություն Խաչատրյանի, նույն ինքը Քավոր Հարութի անչափահաս որդուն՝ 1995 թվականին ծնված Գևորգ Խաչատրյանին՝ ապօրինի զենք պահելու կասկածանքով։ Մեր ունեցած հավաստի տեղեկությունների համաձայն՝ նա հանձնել է նաև ավտոմատը, որը նրա ձեռքին եղել է ապրիլի 23-ին Գյումրիում տեղի ունեցած կրակոցների ժամանակ։
Հիշեցնենք, որ ապրիլի 23-ին՝ ժամը 13.00-ի սահմաններում, Գյումրիի բժշկական կենտրոնից ոստիկանության Գյումրիի բաժնում ահազանգ էր ստացվել, որ Գյումրի քաղաքի Շիրակացի 54բ շենքի մոտից հրազենային վնասվածքներով իրենց մոտ են տեղափոխվել Հարություն Խաչատրյանը և Արտյոմ Կարապետյանը: Վերջինս հիվանդանոցում մահացել էր:
Մեր ունեցած տեղեկություններով՝ Գ.Խաչատրյանը տան մոտ կրակոցներ լսելով ավտոմատը ձեռքին դուրս է եկել, սակայն առայժմ պարզ չէ, արդյոք նա ևս կրակել է, թե ոչ։
Ինչպես արդեն «Փաստինֆոն» տեղեկացրել է, ապրիլի 24-ին ձերբակալվել է նաև Գյումրիի նախկին քաղաքապետ Վարդան Ղուկասյանի եղբորորդի Վահե Ղուկասյանը, ով, ըստ ոստիկանության այսօր տարածած հաղորդագրության, խոստովանել է, որ ինքն է ապրիլի 23-ին կրակել Հարություն Խաչատրյանի և Արտյոմ Կարապետյանի վրա։
Կարդացեք նաև
Վահե Ղուկասյանը հայտնել է նաև, որ միջադեպի ընթացքում Արտյոմ Կարապետյանի կողմից «Մակարով» ատրճանակից արձակված կրակոցից աջ կոնքի շրջանում վնասվածք է ստացել նաև ինքը:
Վ. Ղուկասյանի «Լադա-Պրիորա» մակնիշի ավտոմեքենայի զննությամբ՝ նստելատեղի կողքին հայտնաբերվել և առգրավվել է հանցագործության գործիք հանդիսացող, առանց գործարանային համարի և պահունակի «ԱԿ-74» տիպի ինքնաձիգ և չպարզված տեսակի ատրճանակ` պահունակով, լիցքավորված 3 հատ 6,35 մմ տրամաչափի փամփուշտներով:
Ձեռնարկված օպերատիվ-հետախուզական և քննչական հետագա միջոցառումների արդյունքում՝ ապրիլի 24-ին, ժամը 23.00-ի սահմաններում, ոստիկանության ծառայողները Գյումրի քաղաքի Շիրակացու փողոցի թիվ 54/Բ շենքի ձախ անկյունային հատվածին հարակից տարածքում հայտնաբերել և առգրավել են «Մակարով» տիպի ատրճանակ` պահունակով, լիցքավորված 9 մմ տրամաչափի 5 փամփուշտներով:
Նշանակվել են դատաձգաբանական և դատաբժշկական փորձաքննություններ:
