Վճարովի ավտոկայանատեղիների հետ կապված խնդրի վերաբերյալ Aravot.am-ի հետ զրույցում «Առաքելություն» կուսակցության քաղխորհրդի անդամ, ավագանու թեկնածու Մանուկ Սուքիասյանը ներկայացրեց իրենց տեսակետը. «Ոչ մեկի համար գաղտնիք չէ, որ Երեւանում ցանկացած անկյունում կարող է անդուր եւ հակահիգիենիկ տեսքով մեկը քեզ մոտենալ 100-200 դրամ պահանջել, որը հայտնի չէ, թե ուր է գնում: Երեւանցին ակամայից իր քաղաքում հայտնվել է տնվորի վիճակում»,-ասաց նա` ներկայացնելով իրենց առաջարկը: «Մենք առաջարկում ենք հետեւյալը՝ հանրային վայրերում ավտոկայանատեղիները պետք է լինեն անվճար, բացառությամբ առանձնացված տեղերի, այսինքն՝ դրանք կլինեն նպատակային, հասկանալի կլինի, թե այդ տեղում կանգնելը ինչի համար է վճարովի: Սրա հետ շաղկապված է նաեւ ստորգետնյա ավտոկայանատեղիների կառուցումը: Երբ խոսվում է այս մասին, ասում են, թե թանկ է, իսկ Օպերայի մոտ, որ կառուցվեց, թանկ չէ, այլ բան է, որ այնտեղ այնպիսի աստղաբաշխական գներ են, որ մարդիկ խուսափում են ավտոմեքենա կայանել»:
Սուքիասյանը գտնում է՝ «Քաղաքի հետ կապված բոլոր լայնամասշտաբ ծրագրերի ֆինանսավորման համար եվրոպական մայրաքաղաքներում միշտ չէ, որ սեփական բյուջեից են ծախսում: Երբ դու լինում ես կոռուպցիայի ցածր աստիճանով, բայց ֆինանսական վստահելիության բարձր աստիճանով քաղաքային իշխանություն, ապա գտնվում են դոնորներ, վարկատուներ, որոնց տրամադրած միջոցներով ամենահավակնոտ ծրագրերն ես իրականացնում եւ հենց այդ նույն կառույցների բերած եկամուտուվ էլ փակում թե վարկը , թե մուտքեր ապահովում բյուջեի համար»:
Եվա ՀԱԿՈԲՅԱՆ
