ՀԱԿ ավագանու թեկնածու Արման Մուսինյանի գնահատմամբ՝ իշխող ՀՀԿ ռեժիմը իր հիմնական թիրախը տեսնում է ՀԱԿ-ին:
«Սրա վկայությունն են վերջին օրերին տեղի ունեցած բռնության դեպքերը մեր համակիրների նկատմամբ: Քրեական տարրերը Աջափնյակում հարձակվել էին մեր համակիրների վրա, արդյունքում մեր ակտիվիստ Ալիկ Հախվերդյանը շտապ օգնության մեքենայով հոսպիտալացվեց: Մեծ ակնկալիքներ չունեմ,որ մեղավորները կբացահայտվեն եւ կպատժվեն: Նմանատիպ դեպքեր են տեղի ունեցել նաեւ Ավանում, Կենտրոնում»,- այսօր «Հայացք» ակումբում ասաց պարոն Մուսինյանը:
Նրա համոզմամբ՝ ՀՀԿ-ն ու նրա ավագանու թեկնածուն հասկանում են, որ իրենք արդար ընտրությունների արդյունքում պարտվելու են եւ սկսել են ընտրութունները կեղծելու գործընթացը.« Ընտրությունների օրը կանցնեն կեղծման այլ մեթոդների, բազմակի քվեարկությունների, եւ, եթե դա էլ չօգնի, չեն խորշի տեղամասերում բռնություններ կիրառելուց»:
Պարոն Մուսինյանն ասաց, որ վերջին օրերի իրենց հանդիպումները ցույց են տալիս, որ ՀՀԿ-ի նկատմամբ կա «տոտալ ատելություն, եւ հասարակությունը պատրաստ է իր ձայնը տալ ոչ իշխանական ուժի»:
Կարդացեք նաև
Պարոն Մուսինյանի խոսքերով՝ ՀՀԿ-ն արդեն ցուցակային աճպարարարություն է սկսել: Նրա խոսքերով՝ վերջերս ուսումնասիրել են ընտրացուցակները եւ բացահայտել հազարից ավելի քաղաքացիներ, որոնք փետրվարի 18-ի ընտրութուններում հաշվառված էին մարզերում, իսկ հիմա Երեւանում. «Սա վկայում է այն մասին, որ ՀՀԿ-ն, օգտագործելով պետական՝ անձնագրային ծառայության լծակները, զբաղված է ցուցակային աճպարարությամբ»:
Արփինե ՍԻՄՈՆՅԱՆ
