«ՀՀԿ ավագանու թեկնածու Տարոն Մարգարյանը խոսուն հայտարարագիր է ներկայացրել: Մոտ յոթ միլիոն դոլարի ունեցվածք է հայտարարագրել: Հիշեցնեմ՝ Տարոն Մարգարյանը կրթություն ստանալուց հետո անցել է պետական աշխատանքի, չի ծառայել բանակում եւ բացի պետական աշխատանքից որեւէ այլ բանով չի զբաղվել: Որեւէ բացատրություն չունի՝ ինչպե՞ս են այդ միջոցներն անցել նրա տիրապետության տակ»,- այսօր «Հայացք» ակումբում ասաց պարոն Մուսինյանը:
Նրա խոսքերով` ՀՀԿ-ի ցուցակում տեղ գտած շատ թեկնածուներ եւս աստղաբաշխական հայտարարագրեր են ներկայացրել. «Պատրաստվում ենք հաղորդում ուղարկել պատկան մարմիններին, որ ստուգեն այդ ունեցվածքի ծագումը, որովհետեւ հայտարարագիրը պարունակում է ատկատների, չարաշահումների ռիսկեր: Մինչ օրս ՀՀԿ-ն որեւէ բանական բացատրություն չի տվել, թե այս միջոցները որտեղի՞ց են, ինչը եւս վկայում է, որ առկա են փողերի լվացման, պետական միջոցները վատնելու ռիսկեր»:
Հարցին, թե իրականությանը համապատասխանո՞ւմ են տեղեկությունները, որ ՀԱԿ կուսակցության հիմնադիր համագումարը ֆինանսավորել էր ԲՀԿ-ն, ասաց՝ համակիրներն են ֆինանսավորել. «Մեր ոգեւորված համակիրները շարունակում են աջակցել մեզ՝ գտնվելով մշտական քաղաքական, ֆինանսական ահաբեկման տակ»:
Արփինե ՍԻՄՈՆՅԱՆ
Կարդացեք նաև
