Ըստ սննդամթերքի անվտանգության պետական ծառայության պետ Ա. Բախչագուլյանի՝ չստուգված անասնակերերը կարող են ոչ միայն կենդանիների հիվանդությունների եւ անկման պատճառ դառնալ, այլ նաեւ վնասել մարդու առողջությունը:
Անցյալ տարի «Հանրապետական անասնաբուժասանիտարական եւ բուսասանիտարական լաբորատոր ծառայությունների կենտրոն» ՊՈԱԿ-ի կողմից իրականացվել է կերերի 228 նմուշի հետազոտություն, որից 92 նմուշում անաէրոբները, աղիքային խմբի մանրէները եւ բորբոսասնկերը գերազանցել են սահմանային թույլատրելի խտությունը: Այս մասին ՀՀ կառավարությանը հայտնել է գյուղատնտեսության նախարարության սննդամթերքի անվտանգության պետական ծառայության պետ Աբրաամ Բախչագուլյանը: Ինչպես տեղեկանում ենք կառավարության նիստի օրակարգից, ՀՀ կառավարության այսօրվա նիստում գյուղատնտեսության նախարարի պաշտոնակատար Սերգո Կարապետյանը այս հարցը կներկայացնի վարչապետ Տիգրան Սարգսյանին՝ առաջարկելով «Անասնակերի մասին» ՀՀ օրենքում փոփոխություն կատարել եւ հաստատել կերարտադրության նպատակով օգտագործվող օրգանական, անօրգանական, թունավոր, անցանկալի նյութերի ցանկը:
Նշենք, որ այսօր ոչ մի իրավական ակտով մեր երկրում չեն կարգավորվում ՀՀ ներմուծվող, արտահանվող, ինչպես նաեւ Հայաստանի տարածքում արտադրվող անասնակերում, լրացակերերում, կերային խառնուրդներում, կերային հավելումներում ու կենդանիների կերակրման համար օգտագործվող նյութերում եւ արտադրանքում անցանկալի նյութերի առավելագույն թույլատրելի քանակները: Ուստի գյուղատնտեսության նախարարությունը, «Անասնաբուժության մասին» ՀՀ օրենքի համաձայն, անասնաբուժական վերահսկողություն իրականացնում է նաեւ կերերի եւ լրացակերերի արտադրության, պահպանման, տեղափոխման, իրացման եւ վերամշակման ընթացքում, մեր երկրի պետական սահմանի անցման կետերում երկրի տարածք ներմուծվող եւ երկրից արտահանվող կերերի, լրացակերերի նկատմամբ: «Սակայն հաշվի առնելով այն հանգամանքը, որ ներկա դրությամբ Հայաստանի Հանրապետությունում դեռեւս առկա չեն նորմատիվ իրավական ակտեր, որոնք սահմանում են կերարտադրության նպատակով օգտագործվող անցանկալի նյութերի առավելագույն թույլատրելի չափանիշները, այն է՝ բացակայում են ուսումնասիրության համար ելակետային ցուցանիշները, ուստի մինչ այժմ հնարավոր չի կատարել անասնակերում անցանկալի նյութերի փորձաքննություն»,- նկատում է Ա. Բախչագուլյանը: Ըստ նրա՝ 2012 թվականին կերեր, կերի հետ շփվող նյութեր եւ կերային հավելումներ են մեր երկիր ներկրվել Բելգիայից, Գերմանիայից, Իռլանդիայից, Նիդերլանդներից, Իսպանիայից, Իտալիայից, Լեհաստանից, Ֆրանսիայից, Ուկրաինայից, Չինաստանից, ԱՄՆ-ից, Ռուսաստանի Դաշնությունից եւ Վրաստանից:
Սննդամթերքի անվտանգության պետական ծառայության մասնագետների վստահեցմամբ՝ կենդանիների կերակրման ընթացքում օգտագործվող կերերում, կերի հետ շփվող նյութերում եւ կերային հավելումներում գտնվող անցանկալի նյութերը ներթափանցելով կենդանիների օրգանիզմ եւ կուտակվելով նրանց օրգանիզմում՝ կարող են ոչ միայն կենդանիների հիվանդությունների եւ անկման պատճառ դառնալ, այլ նաեւ վտանգավոր դարձնել կենդանական ծագման սննդամթերքի օգտագործումը մարդու առողջության եւ կյանքի համար:
Կարդացեք նաև
ԼՈՒՍԻՆԵ ԲՈՒԴԱՂՅԱՆ
«Առավոտ» օրաթերթ
