Գործարանը աշխատակիցներին 700 միլիոն դրամ է պարտք, իսկ դատարանը ի վնաս աշխատակիցների է վճիռ կայացրել:
«Ռուսալ Արմենիա» ընկերության աշխատակիցները վաղը նախագահի նստավայրի մոտ ժամը 15.00-ին բողոքի ակցիա են կազմակերպելու եւ դիմում-նամակ հանձնելու նախագահի աշխատակազմին: Գործարանի աշխատակիցները Aravot.am-ի հետ զրույցում պատմեցին, որ 102 աշխատակիցների` վտանգավոր արտադրամասում աշխատելու համար 6 տարվա հավելավճարները, որը կազմում է մոտ 700 միլիոն դրամ, գործարանի ղեկավարությունը հրաժարվում է վճարել: Հավելավճարների վճարման պահանջով աշխատակիցները դիմել էին դատարան.«Առաջին ատյանում դատը հաղթել էինք, հետո գործարանը դիմեց վերաքննիչ դատարան, որն էլ ի օգուտ գործարանի վճիռ կայացրեց, մենք պատրաստվում ենք առաջիկայում դիմել Վճռաբեկ դատարան: Նախագահին էլ խնդրում ենք խնդիրն իր ուշադրության կենտրոնում պահել»:
Նշենք, որ «Ռուսալ Արմենիայի» աշխատակիցները առաջին ատյանի դատարան էին դիմել աշխատավարձերի 100% հավելավճարների վճարման պահանջով, սակայն դատարանը հայցը բավարարել էր մասնակիորեն` ոչ թե աշխատավարձի 100%-ի, այլ` 50%-ի վճարման վճիռ էր կայացրել: 2 կողմերն էլ, դժգոհ մնալով առաջին ատյանից, դիմել էին Վերաքննիչ դատարան՝ աշխատակիցները 100%-ի վճարման պահանջով, իսկ գործարանն էլ ընդհանրապես չվճարելու հայցով, ինչն էլ վերքննիչը բավարարել էր, ուստի աշխատակիցները պատրաստվում են դիմել Վճռաբեկ դատարան: Նշենք նաեւ, գործարանի աշխատակիցների շահերը դատարանում ներկայացնում է իրավաբան Լեւոն Բարսեղյանը:
Կարդացեք նաև
Նելլի ԲԱԲԱՅԱՆ
