«Հաշվի առնելով չակերտավոր ավանդույթները, թե ընտրությունները ինչպիսի արդյունք կարող են ունենալ, մենք ոչ իշխանական ուժերին ներկայացրել էինք առաջարկ՝ ստորագրելով միասնական փաստաթուղթ: Հաշվի առնելով միասնական շտաբի նախորդ փորձը, որ այս անգամ ոչ թե ուղղակի ասուլիսային, արարողակարգային շտաբ լինի, այլ կոնկրետ խնդիր լուծի. տեղամասերում վստահված անձանց միջեւ համագործակցություն լինի, համատեղ մեծամասնության դեպքում ավագանիում ունենալ միասնական թեկնածու, եւ եթե այդ ամեն ինչը չի լինում, ընտրությունները կեղծվում են, ապա դրան տալ միասնական քաղաքական գնահատական եւ քննարկել մանդատները վայր դնելու, համատեղ հանրահավաք անելու հարցերը»,- Aravot.am-ի հետ զրույցում, ներկայացնելով ոչ իշխանական ուժերին արված իրենց առաջարկության մանրամասները, ասաց «Առաքելություն» կուսակցության քաղխորհրդի անդամ, ավագանու թեկնածու Մանուկ Սուքիասյանը:
Նրա խոսքով՝ իրենց առաջարկածը կարծես թե բոլորի հավակնություններին բավարարող փաստաթուղթ էր. «որեւէ մեկին չէր դնում սրբազան կարգավիճակի մեջ, բայց որեւէ մեկը «ոչ» չի ասել, տրամադրել ենք այն, բայց առ այսօր ստորագրված չէ: Իսկ թե ինչու, այդ հարցին միայն նրանք կպատասխանեն, բայց եթե խանգարողը «Առաքելությունն է»՝ բարի, թող իրենք առանց մեզ այդ ամենն անեն, բայց տեսնում ենք, որ իրենց մոտ չի ստացվում»: Սուքիասյանի ձեւակերպմամբ՝ ակնհայտ կարիքների շուրջ երկար բանակցելը բերում է նման տեղապտույտների…
Եվա ՀԱԿՈԲՅԱՆ
Կարդացեք նաև
