Գերմանիայից ժամանած հյուրերը Վանաձորում պատմեցին «Մոր լռությունը» ներկայացման մասին:
«Արմմոնո» թատերական փառատոնին մասնակցելու համար Գերմանիայից Հայաստան ժամանած Ռայներ Բլանքերբուրգն ու Բեա Էհլերսն ապրիլի 23-ին Վանաձորում էին: «Խաղաղության երկխոսություն» Հ/Կ գրասենյակում վանաձորցիների հետ հանդիպման ժամանակ նրանք պատմեցին փառատոնի շրջանակներում ներկայացվելիք «Մոր լռությունը» ներկայացման մասին:
Ապրիլի 26-ին նրանք հանդիսատեսի դատին կներկայացնեն ազգությամբ թուրք, գերմանաբնակ գրող եւ իրավապաշտպան Դողան Ախանլիի «Մոր լռությունը» պատմվածքի հիման վրա բեմադրված համանուն ներկայացումը:
Կարդացեք նաև
«Սա պատմություն է Թուրքիայից Գերմանիա գաղթած, այնտեղ մանկությունն անցկացրած եւ հետագայում թուրքական ազգայնական շարժման մեջ ներգրավված մի աղջկա` Սաբինայի մասին, ով իր մոր մահից հետո բացահայտում է իր հայկական արմատները»,-Aravot.am-ի հետ հարցազրույցում ասում է Սաբինայի դերակատար Բեա Էհլերսին, ում մայրը հայ է, հայրը` գերմանացի: Նա նկատում է, որ ամեն անգամ դերը խաղալիս ինքն իր հետ ներքին կռվի մեջ է գտնվել:
Անդրադառնալով Հայող ցեղասպանության խնդրին` դերասանուհին նշում է, որ այսօրվա գերմանական հասարակությունն ավելի բաց է, քան տարիներ առաջ. «Մինչեւ 2005-2006 թվականները Գերմանիայում ընդունված չէր խոսել ցեղասպանության մասին, ու եթե ես այդ տարիներին ուզենայի նմանատիպ նախաձեռնություններով հանդես գալ, ոչ ոք դա չէր ողջունի, այժմ, սակայն, իրավիճակն այլ է` հասարակությունն արդեն կոտրել է այդ կարծրատիպը, գերմանացիները սկսել են խոսել ցեղասպանության մասին»:
Անուշ ԲՈՒԼՂԱԴԱՐՅԱՆ
