Գառնիկ Սաքանյանը կալանավորված է
Լոռու մարզի Գուգարք գյուղի բնակիչ, 1977թ. ծնված Գառնիկ Սաքանյանին մեղադրանք է առաջադրվել այն բանի համար, որ նա 2011թ. փետրվարից 1-ից աշխատելով «Կոնվեկտ» ՓԲԸ-ի շուկայի զարգացման պատասխանատուի պաշտոնում եւ լիակատար նյութական պատասխանատվություն կրելով՝ 2012թ. հունվար ամսից մինչեւ հուլիսի 18-ն ընկած ժամանակահատվածում նշված ընկերության Երեւանում գտնվող գրասենյակից համապատասխան բեռնագրերով ստացել է «Օրանժ» ընկերության կանխավճարային բջջային հեռախոսակապի լիցքավորման քարտեր եւ էլեկտրոնային լիցքավորման միավորներ, որոնք իրացրել է Լոռու մարզի առետրի մի շարք կետերում:
Կարդացեք նաև
Համաձայն առաջադրված մեղադրանքի՝ Գ. Սաքանյանը, վաճառքից գոյացած կանխիկ գումարներն օգտագործելով իր անձնական կարիքների համար, շահադիտական դրդումներով չի մուտքագրել հիշյալ ընկերության դրամարկղ եւ հավաքագրված 19 միլիոն 130 հազար 570 դրամը յուրացման եղանակով հափշտակել է: Գ. Սաքանյանը կալանավորված է: Նրան մեղադրանք է առաջադրվել ՀՀ քրեական օրենսգրքի 179 հոդվածի 3-րդ մասի 1-ին կետով( «Յուրացնելը կամ վատնելը, որը կատարվել է առանձնապես խոշոր չափերով»): Այս հոդվածով նախատեսվում է 5-8 տարի ազատազրկում՝ գույքի բռնագրավմամբ կամ առանց դրա:
Դատարանում Գ. Սաքանյանի շահերը պաշտպանում է փաստաբան Գուրգեն Հարությունյանը: Որպես իրեղեն ապացույց դատարան են ներկայացվել 2 փաթեթ հաշվապահական փաստաթղթեր: Այս գործով դատավարությունը Լոռու մարզի առաջին ատյանի դատարանում մեկնարկել է մարտի 6-ին, հերթական նիստը նշանակված է մայիսի 3-ին:
Ոսկան ՍԱՐԳՍՅԱՆ
