«Քաղաքային ավագանին նախորդ տարվա դեկտեմբերի 26-ին նոր տեղական տուրք է հնարել տնտեսվարող սուբյեկտների համար: Այն սրճարանները, թեյարանները, հացատները, որոնք գործում են կենտրոնում, այսուհետ հանրային սննդի համար որոշակի տեղական տուրք պետք է վճարեն, բայց սովորաբար այս հաստատությունները ալկոհոլի վաճառքի համար առանձին տուրք էին վճարում, ծխախոտի համար էլ՝ առանձին: Դեկտեմբերի 26 -ին որոշում է կայացվում, որը 3 օր անց ուժի մեջ է մտնում եւ մարդիկ տոներից հետո վերսկսելով իրենց աշխատանքը՝ չակերտավոր հաճելի անակնկալի են գալիս: Դրանք բավականին անցանկալի գումարներ են: Այս մարդիկ քնից վեր են կացել ու որոշել նոր տուրքեր սահմանել, իսկ մենք առաջարկում ենք խստացնող, ավելացնող կամ՝ նոր հարկատեսակների դեպքում դա անել 3 տարին մեկ անգամից ոչ շուտ ու դրա գործողությունը պետք է մեկնարկի որոշման կայացումից առնվազն 6 ամիս անց: Այսինքն՝ նախորդ տարվա հունիսին ընդունված որոշումը հունվարից նոր կարող է ի կատար ածվել»,- Aravot.am-ի հետ զրույցում խոսելով սննդի կետերի համար սահմանված նոր տուրքի մասին, ասաց «Առաքելություն» կուսակցության քաղխորհրդի անդամ, ավագանու թեկնածու Մանուկ Սուքիասյանը:
Սուքիասյանի խոսքով՝ չի բացառվում, որ այս տարվա դեկտեմբերին էլ քաղաքային ավագանին մի նոր տուրք հնարի եւ տնտեսվարողը պարտավոր լինի ի թիվս իր ուղղակի հարկային պարտավորությունների, նաեւ նոր տեղական տուրքեր վճարի: Սակայն այս պարագայում հարց է առաջանում՝ «բա որ այդքան նոր տուրքեր եք սահմանում ու դրանով ավելացնում Երեւանի բյուջեն, ինչու այդպես էլ ոչ մի լուրջ խնդիր լուծում չի ստանում, բացի այդ նստարաններից, ծաղիկներից … Այսինքն ստացվում է՝ անգամ բյուջեի ավելացման դեպքում, միեւնույն է՝ ավելի ամբիցիոզ ծրագրեր քաղաքապետարանը իր առջեւ չի դնում»:
Եվա ՀԱԿՈԲՅԱՆ
Լուսանկարը՝ PanArmenian Photo-ի
