Օրեր առաջ ավարտվեցին Ալինա Կիրակոսյանի «Չգրված նոտաներ» երգի տեսահոլովակի նկարահանման աշխատանքները: Ընթերցողը նրան կհիշի «Հայաստանի ձայնը» նախագծից:
Ալինան, ով որոշել է այսուհետ հանդիսատեսին ներկայանալ ԱԼԻՆԱ ՋԻՆ բեմական անվամբ, աչքի է ընկնում իր նուրբ, կանացի ու գրավիչ հատկանիշներով, բնավորությամբ, իրական արտիստուհուն վայել կերպարով, տեսահոլովակում նույնպես չի դավաճանում մարդկային ճշմարիտ սկզբունքները և հանդես կգա իր իրական տեսակով՝ մեզ ներկայացնելով իր փոքրիկ ու շատ բովանդակալից աշխարհը, որ կոչում է արվեստ՝ թատրոն և երաժշտություն…
Փորձենք մանրամասնել տեսահոլովակի գաղափարը, սյուժեն, և հնարավորինս բացահայտել այլ գաղտնիքներ:
Իմ զրուցակիցներն են երգչուհի, դերասանուհի Ալինա Ջինը և բեմադրիչ Արթուրո Սայանը, ով նաև այս տեսահոլովակի մտահղացման հեղինակը և ռեժիսորն է:
–Անչափ հաճելի է, որ My news-ն առաջինն է, որ լուսաբանում է այս մասին: Կպատմե՞ք ինչպես ծնվեց տեսահոլովակ նկարահանելու գաղափարը:
Ալինա – Ձեզ շնորհակալություն հարցազրույցի առաջարկի համար:
Ինչպես գիտեք վերջերս ավարտվեց «Հայաստանի ձայնը» մեգանախագիծը, և բազմաթիվ հեռուստադիտողներին ու երկրպագուներին որոշեցի երկար չսպասեցնել նրանց և պատրաստեցի այս փոքրիկ անակնկալը: Կարծում եմ հաջողվեց: Շուտով կլինի պրեմիերան, դիտեք և դատեք ինքներդ…
Արթուրո – … վայելեք:
– Ալինա, ես տեղյակ եմ, որ Արթուրոն թատերական բեմադրիչ և դերասան է, ինչո՞ւ որոշեցիք տեսահոլովակի նկարահանումները վստահել հենց նրան: Մտավախություն չկա՞ր, որ համագործակցությունը գուցե չստացվի:
Ալինա – Նախ ասեմ, որ բացի այս ամենը, մենք վաղեմի ընկերներ ենք: Երբ առհասարակ ճանաչում ես մարդուն, փոխադարձ աշխատանքը հաջողությամբ է պսակվում, ավելացնեմ նաև, որ սա մեզ համար աշխատանք չէ, այլ հոգեվիճակ:
Արթուրո – Իմ հերթին շնորհակալ եմ Ալինայից վստահության համար, ուրախ եմ, որ համատեղ այս գործընթացը երկուսիս ստեղծագործական կյանքում էլ առաջինն է: Փորձել ենք ինքնատիպ լինել: Համարձակություն ունեմ ասելու, որ երաժշտական տեսաֆիլմ ենք ստեղծել…
– Ներկայացրեք խնդրեմ ձեր ստեղծագործական թիմը:
Ալինա – Նրանք բոլորն էլ իմ լավագույն ընկերներն են, և հենց նրանց շնորհիվ էլ սկսվեց այս ամենը: Կոմպոզիտոր եւ երգչուհի Ռուզաննա Անդրեասյանը եւ խոսքերի հեղինակ Գոհար Գզողյանն ինձ նվիրեցին այս երգը, գործիքավորեց Սերգեյ Հայրապետյանը և կիթառի գեղեցիկ հնչյուններով համեմեց Կարո Սարաֆյանը: Արդյունքում հասկացանք, որ պետք է նկարահանվի տեսահոլովակ, որովհետև մեր օրերում պակասում են նման երգերը…
Արթուրո – Բոլոր վայրերում մեծ եռանդով ու նվիրվածությամբ աշխատեց նաև մեր նկարահանող խումբը:
– Ինձ հայտնի է, որ Ձեզ վստահել և թույլատրել են նկարահանումներ իրականացնել Երգի պետական և Կամերային թատրոններում…
Ալինա – Այո, այդ առիթով ուզում ենք մեր խորին շնորհակալությունը հայտնել այդ թատրոնների գեղարվեստական ղեկավարներ Արթուր Գրիգորյանին և Արա Երնջակյանին, ովքեր մեզ համար իրական արվեստագետի վառ ներկայացուցիչներ են…
– Մաղթենք նոր երգին և տեսահոլովակին բարեհաջող մեկնարկ և հաջողություններ Ձեզ հետագա ստեղծագործական կյանքում: Անհամբերությամբ սպասենք նաև պրեմիերային…
Արթուրո – Թող մեր կյանքի բոլոր չգրված նոտաները վերջապես արվեստ դառնան…
