«Ի՞նչ անել, որ…». նախադասությունը շարունակում են երիտասարդները: Ամենահետաքրքրասեր «Առավոտ երիտասարդականը» կրկին ծանոթացել է նրանց մտքերին ու «չափել» երևակայության սահմանը:
«Ի՞նչ անել, որ բոլոր գրադարանավարուհիներն ու վաճառողները բարեհամբույր վերաբերմունք ցուցաբերեն», – ասում է 20-ամյա Գոհարը:
25-ամյա Դիանան էլ դժգոհ է. «Ի՞նչ անել, որ անելու բան չկա», – ասում է նա:
«Ի՞նչ անել կամ ինչպե՞ս անել, որ բոլոր համալսարանները վերանան ու քննություններ չլինեն, – ասում է 19-ամյա Սիրարփին և ավելացնում, – լինեն միայն օնլայն համալսարանները, որ ստիպված չլինենք առավոտ շուտ արթնանանք ու վազենք դասի»:
20-ամյա Հրայրը մտահոգ է. «Ի՞նչ անել, որ մարդիկ դադարեն իրար նսեմացնելով վեր բարձրանալ ու ի՞նչ անել, որ հասկանան մի օր կարող է ամեն ինչ հակառակը լինել», – ասում է նա:
17-ամյա Ժաննան էլ անհամբերությամբ սպասում է ամռանն ու ասում. «Ի՞նչ անել, որ ամառը շուտ գա»:
«Ի՞նչ անել, որ ընտրական քարոզարշավներն ու առհասարակ ընտրությունները չազդեն մարդկանց տրամադրության վրա, մանավանդ բացասաբար», – ասում է 22-ամյա Հրանտը:
26-ամյա Մերին էլ հարցը լսելուն պես ասում է, որ համոզված է` այն ինչ ասելու է դժվար թե իրականություն դառնա. «Ի՞նչ անել, որ էլ չլինեն կեղծ անկեղծներ ու հարուստ աղքատներ»:
Տիգրանուհի Թասլակյան
