«Ժառանգություն» կուսակցությունը նախընտրական քարոզարշավի ընթացքում արձանագրել է ՀՀԿ-ի, ԲՀԿ-ի եւ ՕԵԿ-ի կողմից թույլատրված մի շարք ընտրախախտումներ:
Ակտիվիստ Դանիել Իոաննիսյանը այսօր «Փաստարկ» ակումբում ընտրախախտումներից նախ առանձնացրեց մինչեւ քարոզարշավի սկսվելը պետական մարմինների՝ այդ թվում մարզպետարանների կողմից հրահանգված անձնագրային տվյալների հավաքագրումը, հետո թվարկեց խախտումներ քարոզչական պաստառների վերաբերյալ:
Նրա խոսքերով, ՀՀԿ-ն ու ԲՀԿ-ն պաստառներ են փակցնում չթույլատրված վայրերում, ՕԵԿ-ը գրավում է պաստառներ փակցնելու ողջ տարածքը՝ փակցնելով թույլատրված չափից մեծ ու թվով շատ քարոզչական պաստառներ:
«Բացի այդ, ապրիլի յոթին քաղաքապետարանի միջոցներով ծաղիկներ էին բաժանում աղջիկներին եւ ներկայացվում քաղաքապետ Տարոն Մարգարյանի անունից: Այսինքն, համայնքային միջոցների հաշվին Տարոն Մարգարյանի PR-ն էր արվում ապրիլի յոթին»:
Կարդացեք նաև
«Ժառանգությունը» խախտումներ է արձանագրել նաեւ ոստիկանների կողմից: «Ոստիկանները «Բարեւ Երեւան» դաշինքի հավաքների ժամանակ, օրինակ՝ Շենգավիթում քաղաքացիական հագուստով են գալիս եւ նկարահանում բոլոր մասնակիցների դեմքերը»,- ասաց Դ. Իոաննիսյանը: Նա դժգոհեց նաեւ, որ պոկվում են դաշինքի պաստառները, որոնք սահմանված թվաքանակով ու սահմանված վայրերում են փակցվում. «Շենգավիթում խոչընդոտվել է մեր ակտիվիստների կողմից թռուցիկների բաժանումը հանրապետականների կողմից: Խանութների եւ սննդի կետերի դռներին փակցվում են ԲՀԿ-ի եւ ՀՀԿ-ի պաստառներ, ինչը հակասում է Ընտրական օրենսգրքին:
Ակտիվիստի խոսքերով, իրենք մի շարք խախտումներ են նկատել, որոնք դեռ հետազոտման փուլում են:
Դ. Իոաննիսյանի խոսքերով, անցած ուրբաթ օրը տասնվեց խախտումներ են ուղարկել ԿԸՀ՝ պահանջելով վարույթ հարուցել ԲՀԿ-ի եւ ՀՀԿ-ի նկատմամբ, բայց շաբաթ-կիրակի օրերին ՀՀԿ-ի խախտումները անհետացել են:
Արփինե ՍԻՄՈՆՅԱՆ
