Կոտայքի մարզի Արզական գյուղի բնակիչ, մատակարար Արամ Պետրոսյանը հայտարարությամբ դիմել էր Հատուկ քննչական ծառայություն եւ ոստիկանության Կազմակերպված հանցավորության դեմ պայքարի գլխավոր վարչություն:
Նա հայտնել էր, որ Լուսակերտի տոհմային թռչնաբուծական ֆաբրիկա ՍՊ ընկերության գլխավոր տնօրեն Ա.Եփրեմյանը կեղծ պայմանագրերով, դրամարկղային ելքի օրդերի կազմման միջոցով իրեն է «տվել» 193000000 ՀՀ դրամի փոխառություն:
Արամ Պետրոսյանը տեղեկացրել էր, որ թռչնաբուծականը դիմել է դատարան, երբեւէ իրեն չտրամադրված գումարի բռնագանձման պահանջով, եւ ինչպես նախկին մի քանի աշխատակիցներից, որոնք պայմանական ազատազրկման են դատապարտվել, իրենից եւս փորձում են վերցնել սեփական «Լեքսուս» ավտոմեքենան, Աբովյան քաղաքում գտնվող Պիոներական փողոցի 429.5 քմ. մակերեսով խանութն ու 0. 0635 հա մակերեսով հողատարածքը:
«Իրականում ես որպես փոխառու գլխավոր տնօրենի հետ պայմանագիր չեմ կնքել, վերոհիշյալ գումարը չեմ ստացել, դրանք կեղծ փաստաթղթեր են»,- ասում է Ա.Պետրոսյանը:
Կարդացեք նաև
Նա նաեւ տեղեկացնում է, որ այդ մասին Հատուկ քննչական ծառայությունում բացատրություններ են տվել ինչպես ինքը, այնպես էլ թռչնաբուծականի նախկին աշխատակիցները:
Ա.Պետրոսյանն ասում է, որ ԱԺ նախկին պատգամավոր, նախկին սեփականատեր Խաչիկ Մանուկյանին տանիք ունենալով, գլխավոր տնօրենը եւ սեփականատեր Մհեր Բագրատյանը խլել են իրենց շարժական եւ անշարժ գույքը:
Մեր տեղեկություններով Հատուկ քննչական ծառայությունում նախաքննությունը շարունակվում է:
Արամ Պետրոսյանը, նրա եղբայրը՝ նախկինում կալանավորված Գեղամ Պետրոսյանը , որոնց պաշտպանն է փաստաբան Գեւորգ Շիրինյանը, կանչվել են առերեսման ինչպես Խաչիկ Մանուկյանի, այնպես էլ Մհեր Բագրատյանի, նրա վարորդի (ըստ հայտարարության՝ նա անգամ բռնարարքի է ենթարկել աշխատակիցներին) հետ:
