Պետական կլինիկան սեփականաշնորհելու ժամանակ այդ մասին չե՞ն մտածել
Տավուշը թերեւս հանրապետության միակ մարզն է, ուր սոցիալական տարբեր խմբերի անդամները հնարավորություն չունեն ատամի պրոտեզներ տեղադրելու: Նշենք, որ կարիքավոր ճանաչված սոցիալական տարբեր խմբերի անդամներին այդ ծառայությունը մատուցվում է անվճար:
Մեր հարցմանն ի պատասխան՝ Տավուշի մարզպետարանի աշխատակազմի առողջապահության եւ սոցիալական ապահովության վարչության պետ Կարինե Դովլաթբեկյանն ասաց, որ մարզի որեւէ ատամնաբուժական կլինիկա պետության հետ այդ ծառայության մատուցման պայմանագիր չի կարող կնքել, քանի որ դրա համար համապատասխան սերտիֆիկատ չունի: Նման սերտիֆիկատ ունի միայն Իջեւանի ստոմատոլոգիական կլինիկան, որը, սակայն, հրաժարվում է պետության հետ այդ նպատակով պայմանագիր կնքել:
Այդ կլինիկան պետական ձեռնարկություն էր, այն մասնավորեցվել է 2010 թվականի վերջին: Սույն կլինիկան սեփականաշնորհելու ժամանակ կարելի էր մտածել հիշյալ խնդրի մասին:
Կարդացեք նաև
Սոցիալական տարբեր խմբերի տավուշցի անդամները ստիպված են լրացուցիչ ծախսեր կատարել եւ ատամների պրոտեզներ տեղադրելու համար մեկնել Երեւան, Վանաձոր եւ այլուր:
Ոսկան ՍԱՐԳՍՅԱՆ
