Ազգային գրադարանի անվտանգությունն ուժեղացվել է, մասնավորապես փոխվել են կողպեքները, տեղադրվել անվտանգության տեսախցիկներ: Այս մասին մեզ հետ զրույցում տեղեկացրեց Ազգային գրադարանի տնօրեն Տիգրան Զարգարյանը:
Այս վերազինումները տեղի են ունեցել այն բանից հետո, երբ բացահայտվեց, որ Ազգային գրադարանում 2010թ.-ի հունիսից մինչև 2011թ.-ի նոյեմբերը պարբերաբար կատարվել են գողություններ, որոնց արդյունքում հանցագործ խմբին հաջողվել էր գրադարանից հափշտակել 150 միավոր 1800-1900թթ հրատարակության, ռուսերեն, մատենագիտական նշանակության արժեքավոր գրքեր:
Հիշեցնենք, որ ոչ միայն Ազգային, այլև ԵՊՀ գրադարաններից կատարված գողությունների համար ձերբակալվել և դատապարտվել են ազգությամբ վրացի Վաժա Ազարիաշվիլին, նրա հանցակիցներ՝ Ազգային գրադարանի շենքի պահպանությունն իրականացնող 2 ոստիկաններ Երվանդ և Դավիթ Ղամբարյանները, ոստիկանության ակադեմիայի ուսանող Վարդան Եղիազարյանը, Կարեն Հովհաննիսյանը և ԵՊՀ Բաժնի վարիչ Հասմիկ Դուրգարյանը, իսկ շենքի պահպանությունն իրականացնող մեկ այլ ոստիկան ՝ Աբգար Հովսեփյանը ծառայության վայրը ինքնակամ լքելու հիմքով դատապարտվել է անփութության համար:
Հանցագործության բացահայտումից և մեղավորներին պատժելուց բացի, քննությունը վարող մարմինը՝ ՀՀ հատուկ քննչական ծառայությունը, գրավոր միջնորդություն էր ներկայացրել՝ գրադարանի ղեկավարության ուշադրություն հանցագործության կատարմանը նպաստող հանգամանքների վրա։ Դրանցից առաջինը Ազգային գրադարանի շենքի անվտանգության խնդիրն էր: Գրապահոցներ, որտեղ պահվում են մեծ արժեք ներկայացնող գրքեր պարզվել է կարելի էր մուտք գործել հասարակ բանալու օգնությամբ, ընդ որում, ինչպես ցույց էր տվել քննչական փորձարարությունը, դրանցից մի քանիսով նույնիսկ կարելի էր բացել միաժամանակ մի քանի դռներ: Շենքը ապահովված չի եղել նաև անվտանգության տեսախցիկներով:
Կարդացեք նաև
«Մեր ուժերով, ինչ-որ բաներ արել ենք, բայց դա վերազինման մեծ և ծախսատար ծրագիր է, նախագիծը կազմել ենք և ներկայացրել քաղաքաշինության նախարարություն»,- նշեց Ազգային գրադարանի տնօրենը:
Քաղաքաշինության նախարարությունն էլ, ինչպես տեղեկացրեց Տիգրան Զարգարյանը, պետք է մրցույթ հայտարարի, և դրանում հաղթող կազմակերպությունն արդեն կյանքի կկոչի Ազգային գրադարանի վերազինման ամբողջական ծրագիրը: Ի դեպ, վերազինումը, տնօրենի խոսքով, ոչ միայն տեսահսկող սարքերով է սահմանափակվելու, այլև հակահրդեհային եւ այլ անվտանգության համակարգերով:
Ինչ վերաբերում է գրադարանի գրապահոցների հեշտությամբ բացվող կողպեքին, դրանց միջուկները գրադարանն արդեն իսկ սեփական միջոցներով ամբողջովին փոխվել է, անգամ որոշ դռների փոխարեն պատեր են շարվել՝ փակելով փողոցից գրապահոցներ տանող նախկին մուտքերը:
