Այսօր մայրաքաղաքի Կենտրոն վարչական համայնքում, Նար-Դոսի դպրոցին հարակից շենքերի բնակիչների հետ հանդիպման ժամանակ Երեւանի ավագանու գործող անդամ եւ թեկնածու Լեւոն Իգիթյանը այսպես կոչ արեց երեւանցիներին, որպեսզի մայիսի 5-ին իրենց ձայնը տան ՀՀԿ-ին եւ Տարոն Մարգարյանին: Լեւոն Իգիթյանը նախ ասաց, որ մինչեւ այժմ ինքը մտածել է, թե երեւանցուն քարոզելը սխալ է, քանի որ եթե «ինքը քաղաքը չի սիրում, քարոզես-չքարոզես՝ մեկ է»:
Իր ճառերի ավանդական կարգի համաձայն, պարոն Իգիթյանն այնուհետեւ սկսեց պատմել 60-ականների Երեւանի անշուք եւ անհրապույր վիճակի մասին, հասնելով մեր օրերին, ասաց, որ իր գնահատմամբ՝ վերջին 20-25 տարիներին քաղաքային իշխանությունները եւ հանրությունը զբաղված է եղել քարեր շաղ տալով: «Հիմա եկել է քարերը հավաքելու ժամանակը»,- ասաց Իգիթյանը՝ կոչ անելով պարտքերը վերադարձնել մայրաքաղաքին, ու նկատեց, որ ՍՍՀՄ-ից ծանր ժառանգություն ենք ստացել: Այդպես բացատրեց մտավորականը ներկայիս խնդիրները, ասելով, որ դրանք վերջին 20 տարիների ընթացքում ընդամենը խորացել են:
Ապա Կենտրոնի բնակիչներին հորդորեց վստահել ամենալավ բժշկին ու Տարոն Մարգարյանի գովքն անելով նկատեց. «Քաղաքապետ ընտրելուց մարդու քոքին պիտի նայես»: Ըստ Իգիթյանի, մայիսի 5-ին «մեր քաղաքի դատավճիռն ենք կարդալու»:
Կարդացեք նաև
Մինչ այդ Տարոն Մարգարյանը արտասանել էր իր ավանդական ճառը, որ բոլոր բակերն ու վարչական շրջանները իրենց հարազատ են եւ որ իրենց թիմը ծառայելու է բնակիչներին:
Այսօրվա հանդիպման ժամանակ ելույթ ունեցավ նաեւ ՀՀԿ ավագանու ցուցակում ընդգրկված Նատալիա Լափաուրին: Նկատենք, որ Լափաուրին ավագանու անցած ընտրություններում ԲՀԿ-ի ցուցակում էր եւ ԲՀԿ-ից ընտրված ավագանու կազմում: Կարճ ժամանակ անց նա լքեց ԲՀԿ-ն՝ ինչ-ինչ անհամաձայնությունների պատճառով, այժմ հանգրվանել է ՀՀԿ-ում:
Այնուհետեւ ՀՀԿ ցուցակի 3-րդ հորիզոնականը զբաղեցնող Հովհաննես Թոքմաջյանը իր ելույթում նկատեց, որ Տարոն Մարգարյանը «հիմքերով դուրս է եկել այդ հողից»: Ասաց, որ նա 5 երեխա ունի, որոնք այստեղ են ապրելու, «չեն գնալու ամերիկաները»:
Թոքմաջյանը նաեւ հավելեց, որ Տարոն Մարգարյանը նահապետական ընտանիքի զավակ է, ով երբեք չի օգտվել հոր թողած իրավունքներից, «ինքնուրույն շարունակում է բեռ քաշել»: Թոքմաջյանը նաեւ ասաց, որ ՀՀԿ ավագանու ցուցակում ընդգրկված անկուսակցական մտավորականների թիմը Տարոն Մարգարյանին հանգիստ չի տալու, պահանջելով, որ օր առաջ լուծվեն քաղաքացիների առջեւ ծառացած խնդիրները: Որպես օրինակ, պարոն Թոքմաջյանը բերեց Փակ շուկայի խնդրահարույց հարցը, ասելով, որ իրենք պահանջելու են, որպեսզի Տարոն Մարգարյանն օգտագործի իր բոլոր լիազորությունները՝ Փակ շուկան, որպես պատմամշակութային արժեք, հին տեսքով պահպանելու համար:
Նելլի ԳՐԻԳՈՐՅԱՆ
Եթե քաղաքապետ ընտրելիս պետք է մարդու քոքին նայել, ապա պալատական գովերգող “մտավորականին” ճանաչելու համար իսկի էլ կարիք չկա մարդու քոքին նայել` նրա բառերից ու հաճոյախոսություններից էլ հասկացվում է, որ ինքն ա:
Վոնց չե՛ք ամաչում, ի՛նչի եք խաբում ու կործանում Հայաստանը : Մինչեվ երբ պիտի քծնվեք ու սողաք: