Արևմտյան Հայաստանի Ազգային խորհրդի նախագահ Արմենակ Աբրահամյանի կարծիքով, քանի դեռ լիովին չի ճանաչվել Հայոց Ցեղասպանությունն ու իրավական տեսանկյունից՝ այն չի դատապարտվել, ապա այն կարող է շարունակվել:
Որպես իր խոսքերի ապացույց, Արեւմտյան Հայաստանի խորհրդի նախագահն օրինակ է բերում Հին Ջուղայի գերեզմանոցի ոչնչացման փաստը:
«Ջուղայի գերեզմանոցի ոչնչացումն ուղղակի հայ ժողովրդի ցեղասպանության շարունակությունն է: Հայ ժողովրդի ցեղասպանության հատուցումը երբեք չի կարող փողով լինել: Անոնք, որ փողով միտք ունին փակելու ցեղասպանությունը, թույլ են տալիս, որ ցեղասպանությունը շարունակվի, ու այդ պետությունն իր բոլոր հարցերը կարողանա փողով լուծել»,-այսօր «Նոյյան Տապան» լրատվական կենտրոնում ասաց Ա. Աբրահամյանը՝ նկատելով, որ Հայոց Ցեղասպանության ճանաչման հարցը ոչ ավելի կարեւորելով՝ պետք է հարցը ներքաշել նաեւ իրավական հարթություն:
Բանախոսի խոսքով.«Ցեղասպանության հարցը երեւույթ մը չէ, որ պիտի ցուցահանդեսներով, ժողովներով այդ հարցը տանեն, ցեղասպանությունը հանցագործություն մըն է, որ պիտի փոխանցվի իրավաբանական դաշտի մեջ»:
Կարդացեք նաև
Aravot.am-ը պարոն Աբրահամյանից հետաքրքրվեց, թե ի՞նչ կտա վերջերս ԱՄՆ-ի Մենն նահանգի կողմից Հայոց Ցեղասպանության ընդունման փաստը ու արդյոք այդ նույն փաստը ինչ-որ ձեւով կարո՞ղ է ազդել նախագահ Օբամայի ամենամյա ելույթի բովանդակությանը:
«Մեզ այդպիսի ճանաչումներ պետք չեն, եթե չկան իրավական գործընթացներ»,- պատասխանեց Արեւմտյան Հայաստանի Ազգային խորհրդի նախագահը՝ ընգծելով, որ տարբեր երկրների կողմից Հայոց Ցեղասպանության ճանաչումն ավելի արդյունավետ կլիներ, եթե մինչ այդ ձեւավորված լիներ ցեղասպանությունը դատապարտող իրավական գործընթաց:
Աշոտ ԱԹԱՅԱՆ
