Այսօր «Ֆորում» ակումբում Aravot.am-ը ՀԱԿ նախկին անդամ Գուրգեն Եղիազարյանից հետաքրքրվեց՝ այն, որ Րաֆֆի Հովհաննիսյանի հանրահավաքներին հաճախ տեսնում ենք Կոնգրեսի նշանը վզից կախված մարդկանց, դա չի՞ խոսում ՀԱԿ-ից հիասթափության մասին: Նա պատասխանեց, որ նրանք այն քաջ կոնգրեսականներն են, որոնք ամեն կերպ ուզում են հակառակվել այս իշխանություններին. «Մարդիկ գումար չունեն, երեխայի ատամը ցավում է, չեն իմանում ինչ անեն, որ ատամնացավն անցկացնեն»:
Մեր դիտարկմանը, որ մինչեւ 7 տարեկան երեխաներին բուժօգնությւոնն անվճար է, Գուրգեն Եղիազարյանը հակադարձեց. «Գիտեմ անվճարը, բայց ասենք 8 տարեկան երեխա լինի, ծնողն ի՞նչ անի: Ասենք մեծահասակը, որ օպերացիայի կարիք ունի, բայց Պարույր Հայրիկյանը չի, ի՞նչ անի, որտեղ մի հատ հաստավիզ որոշի 50 հազար դոլար տա: Մյուս կողմից էլ մի բան ասեմ՝ պետք է գտնել էդ խիրուրգին պետք է դատի տալ, որ չկարողացավ մի հատ գնդակ մարմնի միջից հանի: Մի գնդակ, որը ուրիշ ոչ մի օրգան չէր վնասել, այնպես հանի, որ մեր բյուջեից 50 հազար դոլար չհանեն տանեն:
Սերժ Սարգսյանի խնամին չէ՞ր էդ հիվանդանոցի տերը: Ըտենց խնամի՞ են պահում: 50 հազար շաբաշ չեն տալիս, ի՞նչ անի քաղաքացին շաբաթներով գնա, տնքա: Մի հատ լուրջ դրեք էդ խիրուրգի հարցը: Ասեք անշնորհք, չես կարողանում վիրահատություն անել, մի արա: 50 հազար դոլարով քանի անօգնական ծերերին կարող էին դեղեր տալ»:
Հռիփսիմե ՋԵԲԵՋՅԱՆ
