«Կալիֆորնիա Կուրիեր» թերթի խմբագիր Հարութ Սասունյանը վստահ է, որ 2014 թվականին Հայաստանի տրամադրվող ամերիկյան օգնությունը ռեկորդային չափով կրճատելու` Սպիտակ տան որոշումը որեւէ քաղաքական ենթատեքստ չունի:
«Այս գումարը ոչ մի կապ չունի ընտրությունների կամ այլ քաղաքական հաշիվների հետ, որովհետեւ միայն Հայաստանի հարցը չէ, այլ աշխարհի բոլոր երկրների համար է կրճատում», – «Ազատություն» ռադիոկայանի հետ զրույցում կարծիք հայտնեց «Կալիֆորնիա Կուրիեր» թերթի խմբագիրը,- «Իսկ եթե քաղաքական պատճառներով լիներ որեւէ որոշում, տրամաբանությունը մեզ կուղղեր այդ ուղղությամբ, որ պետք է գումարը ավելացվեր եւ ոչ թե կրճատվեր, որովհետեւ ամերիկյան կառավարությունը ասել է, որ ընտրությունները ավելի լավ էին, քան թե անցյալին»:
Հիշեցնենք, անցյալ շաբաթ Սպիտակ տունը հրապարակեց հաջորդ տարվա բյուջեի նախագիծը` առաջարկելով կրճատել Հայաստանին տրամադրվող տնտեսական օգնությունը միանգամից մոտ 40 տոկոսով` 40 միլիոնից հասցնելով 25 միլիոն դոլարի: Եթե օրենսդիրները հաստատեն նախագահ Օբամայի այս առաջարկը, ապա հաջորդ տարի Երեւանը Վաշինգտոնից կստանա ամենաքիչ օժանդակությունը 1988 թվականի երկրաշարժից ի վեր:
Հարութ Սասունյանը, սակայն, փաստում է, որ ամերիկահայ լոբբիստական կազմակերպություններն արդեն իսկ մեծ աղմուկ են բարձրացրել եւ դիմել են հայամետ կոնգրեսականներին` Օբամայի առաջարկած 25 միլիոն դոլարի փոխարեն Հայաստանին երկու անգամ ավելի շատ` 50 միլիոն դոլարի օգնություն տրամադրելու խնդրանքով: Հաշվի առնելով նախորդ տարիների փորձը` ամերիկահայ գործիչը վստահ է` փաստաթղթի վերջնական տարբերակում կամրագրվի միջին որեւէ թիվ Օբամայի առաջարկած նվազագույնի եւ հայ համայնքի պահանջած առավելագույնի միջեւ:
Կարդացեք նաև
«Ոչ մեկը այս պահին չի իմանում, թե վերջնական գումարը ինչ պետք է լինի: Մի տեսակ առեւտուր է: Մենք միշտ ավելին ենք ուզում, Սպիտակ տունը` նվազագույնն է առաջարկում, Կոնգրեսը միջին ճանապարհ է գտնում հայության փափագի եւ Սպիտակ տան նվազագագույն առաջարկի միջեւ», – ասաց ամերիկահայ խմբագիրը:
Նշենք, որ 2014 թվականի բյուջեի նախագծի շուրջ քննարկումները Միացյալ Նահանգների Կոնգրեսում կշարունակվեն եւս մի քանի ամիս: Փաստաթղթի վերջնական տարբերակը, ինչպես նաեւ Հայաստանի հատկացվող օգնության չափը, ըստ Սասունյանի, հայտնի կդառնա միայն ամռանը:
Հեղինե Բունիաթյան
«Ազատություն» ռադիոկայան
