Ինչպես Aravot.am-ին տեղեկացրեց Սամվել Բալասանյանի մամլո քարտուղար Զոհրապ Եգանյանը, Գյումրու քաղաքապետի երկարատև բանակցությունների արդյունքում հոլանդացիները որոշել են ներդրումներ կատարել հանրապետության երկրորդ քաղաքում: Ա.Էն.Էս «Ֆեշիոն գրուպ» հոլանդական կազմակերպությունը արդեն իսկ հիմնել է կարի արտադրամաս՝ փնտրելով համապատասխան կադրեր: Զոհրապ Եգանյանի տեղեկացմամբ, ընկերությունը պատրաստ է անգամ համապատասխան ուսուցում կազմակերպել ոչ մասնագետների համար: Նշենք, որ ընկերությունը այս պահին աշխատանքի է հրավիրում 17-40 տարեկան կանանց և 18-30 տարեկան տղամարդկանց:
Չնայած տարիքային սահմանափակումներին՝ ծրագիրը հաջողությամբ գործարկվելու դեպքում փոքր-ինչ կթեթևացնի պաշտոնապես ամենաաղքատ ճանաչված քաղաքի բնակիչների ապրելակերպն ու կնվազեցնի գործազրկության մակարդակը:
Հիշեցնենք, որ Խորհրդային տարիներին Գյումրին փայլել է կարի արտադրությամբ, հատկապես Տեքստիլ արդյունաբերությամբ:
Տեքստիլագործների գործարանը իր հզորությամբ երկրորդն է եղել ԽՍՀՄ տարածքում, և այնքան թափուր աշխատեղեր է ունեցել, որ դրսից հյուընկալել է ԽՍՀՄ կազմում գտնվող բոլոր երկրների բնակչությանը, հատկապես կանանց: Գյումրեցիների հիշողության մեջ դրսից եկած տեքստիլագործները, անկախ ազգությունից, մնացել են որպես «ֆեզեի ռուսներ» անվանումով: Հետաքրքիրն այն է, որ մինչև օրս էլ Գյումրիում հարս դարձած, այս քաղաքի տղամարդկանց հետ ամուսնացած այլազգի տեքստիլագործների մասին խոսելիս, գյումրեցիները պարտադիր շեշտում են «ֆեզեյի աղջիկ է»:
Կարդացեք նաև
Նունե ԱՐԵՎՇԱՏՅԱՆ
