«Առավոտ երիտասարդականի» զրուցակիցը հայկական էստրադայի ամենանուրբ, կանացի, քաղցր ու հաճելի ձայնային տվյալներով երգչուհիներից մեկն է՝ Սիլվա Հակոբյանը, ով վերջերս է վերադարձել Եվրոպա կատարած իր մենահամերգներից: Բազմաթիվ տղամարդկանց սիրտը գերող, երկրպագուների մեծ բանակ ունեցող երիտասարդ երգչուհու հետ մենք զրուցեցինք սիրո, երջանկության. տղամարդու և կնոջ հարաբերությունների մասին:
Սիլվա, տղամարդկանց ո՞ր քայլն եք ամենից շատ գնահատում:
-Նվիրվածությունն ու հարգանքը սիրած աղջիկնների և կանանց նկատմամբ, նաև հոգատարությունը:
Կնշե՞ք 3 երեք կարևոր հատկանիշ, որ ամենից շատ են Ձեզ գրավում տղամարդկանց արտաքինի մեջ:
-Առաջին հերթին խնամված լինելը, կոշիկների մաքրությունը և ճաշակով հագուկապը:
Ըստ Ձեզ ինչպե՞ս կարելի է հասկանալ, որ սիրահարված եք:
-Դա կարող է տարբեր կերպ արտահայտվել: Բայց առաջին հերթին երևի այն, որ չես դադարում մտածել տվյալ մարդու մասին, ու նրան տեսնելուց սրտումդ ինչ-որ բան է կատարվում:
Ե՞րբ եք վերջին անգամ սիրահարվել և ի՞նչ եք զգացել:
-Բոլորը զարմանում են, բայց ես դեռ չեմ սիրահարվել, իսկ սիրո վերաբերյալ հարցերին պատասխանում եմ իմ ընկերների կարծիքների վրա հիմնվելով: Ես սիրելու եմ մեկ անգամ ու մեկին…
Ըստ Ձեզ՝ ի՞նչ պիտի անեն կինն ու տղամարդը միմյանց երջանկացնելու համար:
Ամենակարևորը լցված լինեն փոխադարձ հարգանքով, թև ու թիկունք լինեն միմյանց, հաշվի առնեն միմյանց կարծիքները , երկուսն էլ նայեն միևնույն ուղղությամբ, և , իհարկե, շատ սիրեն միմյանց, որովհետև երբ սիրում ես, կարողանում ես շատ բաների վրա աչք փակել:
Ձեր կարծիքով՝ կինը ինչպե՞ս պետք է ներկայանալ առաջին հանդիպմանը:
-Պատշաճ տեսքով. ցանկալի է, որ շատ դիմահարդարված չլինի, որովհետև հաճախ տղամարդիկ գնահատում են կանանց բնական գեղեցկությունը, ուստի կինը կարող է ավելի համեստ տեսքով ներկայանալ. հագնվել այնպես, ինչպես հարմարավետ է իրեն, բայց անպայման հաշվի առնել հանդիպման վայրն ու միջավայրը, դա կօգնի իրեն արագ կողմնորոշվել հագուստի ընտրության հարցում: Իսկ ամենակարևորը՝ կինն այդ օրը պետք է լինի մաքսիմալ անկեղծ:
Ինչի՞ մասին խոսել ժամադրության ընթացքում:
-Այն թեմաներից, որոնք հաճելի են և լավ տրամադրություն են ապահովում: Շատ դեպքերում պահն է թելադրում խոսակցության թեման, այնպես որ դա կարելի է թողնել զույգերի հայեցողությանը:
Իսկ որտե՞ղ ժամադրվել սիրած մարդու հետ:
-Այնպիսի վայրում, որտեղ աղմուկը մի փոքր քիչ կլինի. դա կարող է լինել սրճարանում կամ բնության գրկում գտնվող գողտրիկ անկյունում, ինչը կօգնի զույգերին ավելի լավ զգալ ու միմյանց հասկանալ: 
Հերդերն ասում է. «Յուրաքանչյուր կնոջ սխալի մեջ տղամարդու մեղք կա»: Իսկ Դուք ի՞նչ եք կարծում:
–Ես էլ եմ այդ կարծիքին, որովհետև հաճախ կանայք սխալներ են գործում՝ տղամարդկանց արած սխալներից դրդված : Փաստը մնում է փաստ, որ կինն առանց տղամարդու չի կարող, տղամարդն էլ ՝ առանց կնոջ, հետևաբար տղամարդու կողմից յուրաքանչյուր սխալ քայլ կարող է ճակատագրական լինել կնոջ համար, մանավանդ այն դեպքում, երբ տվյալ մարդը քո կյանքի կեսն է:
Սիլվա, Ձեր կարծիքով և՛ կնոջ, և՛ տղամարդու համար ո՞րն է ամուսնանալու լավագույն տարիքը:
-Կնոջ համար 25տարեկանից հետո, իսկ տղամարդու՝ 30: Իմ կարծիքով ՝հիմնականում այդ տարիքում է , որ երկուսնն էլ դառնում են գիտակից ու պատրաստ ամուսնական հաճելի «բեռը» վերցնել իրենց ուսերին :
Քանի՞ երեխա կցանկանաք ունենալ և ինչպիսի՞ն կցանկանաք, որ լինեն Ձեր երեխաները:
-Ես միշտ երազում եմ զույգ աղջիկներ ունենալու մասին, չգիտեմ՝ կարժանանա՞մ այդ բախտին, թե՝ ոչ , այնուամենայնիվ, կցանկանամ 4 երեխա ունենալ, որովհետև երեխաները՝ այն էլ հայկական ընտանիքում, պետք է շատ լինեն… Առաջին հերթին կցանկանամ, որ իմ երեխաները լինեն լավ մարդիկ, ինչն ամենագնահատելին է այս կյանքում, իսկ ինչ վերաբերում է մասնագիտությանը, դեմ չէի լինի, եթե զբաղվեին երաժշտությամբ:
Սիլվա, իսկ Դուք ե՞րբ կլքեք ցանկալի հարսնացուների շարքը:
-Ժամանակը ցույց կտա:
Իսկ ո՞ր դեպքում չեք ամուսնանա Ձեր սիրած տղամարդու հետ:
-Եթե չթույլատրի զբաղվել իմ սիրած գործով, բայց հուսով եմ` նման փաստի առաջ չեմ կանգնի. դա նաև կախված է իմ ընտրությունից:
Զրուցեց՝ Նազենի Բաղդասարյանը
Լուսանկարները՝ Սիլվա Հակոբյանի ֆեյսբուքյան էջից
