Այսօր Գյումրիում իրենց հերթական արտագնա նիստը անցկացնող «Նախախորհրդարան» քաղաքացիական շարժման համակարգող Գարեգին Չուքասզյանը դարձյալ ներկայացրեց Հայաստանը ներկա քաղաքական փակուղուց դուրս գալու իրենց քարտեզը, նոր որակի պետության ստեղծման ճանապարհը: Նա ասաց, որ ապրիլի 9-ից հետո փոխել են Րաֆֆի Հովհաննիսյանի հետ հարաբերությունների ձևաչափը. մայիսից սկսած «Նախախորհրդարան» ու «Սարդարապատ» շարժումները իրենք են կազմակերպելու հանրահավաքներ:
«Մենք, ինչպես ասել ենք բազմիցս, կարծում ենք, որ Հայաստանում ներկա կառավարման համակարգը դատապարտված է: Կտրելով իր հետադարձ կապը ժողովրդի հետ` ինքն իրեն դատապարտել է քայքայման, չնայած արտաքուստ թվում է, թե իրենք ավելի ու ավելի են կենտրոնացնում իշխանությունը իրենց ձեռքում, սակայն, իրականում, կտրվելով իշխանության աղբյուրից, որը ժողովուրդն է, իրենք դատապարտում են իրենց մոտալուտ քայքայման: Սա մի կողմից թվում է, թե ինքն իրեն պետք է բերի նորի ստեղծման, բայց մենք էդպես չենք կարծում: Կարծում ենք, որ դա վտանգավոր է երկրի համար, որովհետև հղի է անկանխատեսելի հետևանքներով: Մենք նման զարգացումներ տեսել ենք օրինակ Կիրգիզիայում, երբ որ այնքան էր կապը կտրվել գործող իշխանության և ժողովրդի միջև, որ դա բերեց պայթյունի: Մեր նման տարածաշրջանում գտնվող երկրի համար այդպիսի շռայլությունը անթույլատրելի է, մյուս կողմից անթույլատրելի է այն վիճակը, որն այսօր գոյություն ունի` հուսահատության , արտագաղթի և տնտեսական այն իրավիճակը, որը ստեղծված է երկրում, մշակութային բարոյազրկման էդ ընդհանուր մթնոլորտը:
Բնականաբար մենք կարծում ենք, որ լուծումը զուգահեռ իշխանության ստեղծումն է: Ապօրինի այն իշխանությունը, որը կա , դրան զուգահեռ հնարավորություն կստեղծի, որ ժողովուրդը իսկապես ընտրություն ունենա ինքը իր գործողություններով և մասնակցությամբ ապահովի այդ երկրորդ բևեռի ամրացում, մինչև առաջին բևեռը լրիվ կկազմաքանդվի»:
Բանախոսը Հայաստանում տիրող իրավիճակը որակեց որպես նոր գաղութատիրական կամ ետգաղութատիրական: Նա մեկ անգամ ևս կրկնեց, որ Հայաստանում իշխանության փոխարեն ընդամենը ադմինիստրացիա է գործում, որը սպասարկում է արտաքին ուժերի, այլ ոչ թե ժողովրդի շահերը: «Այն մեխանիզմը, որ բացակայում է Հայաստանում,սեփական ժողովրդի շահերը թարգմանող մեխանիզմն է», -ասաց Գարեգին Չուքասզյանը:
Կարդացեք նաև
Նունե ԱՐԵՎՇԱՏՅԱՆ
