Նա կարեւորում է մեծ ֆիդայու արձանի եւ թանգարանի հիմնումը
Իջեւանի տարածաշրջանի սահմանամերձ Դիտավան գյուղի բնակիչ, անհատ ձեռներեց Արշակ Սարիբեկյանը 1990-ական թվականներին պաշտպանել է Իջեւանի սահմանագոտին, եղել սահմանապահ դասակի հրամանատար: Նա միաժամանակ վարել է գյուղատնտեսական տնտեսություն, իր անձնական տնտեսությունից 1,5 տոննա միս եւ մեծ քանակությամբ պանիր նվիրաբերել նորաստեղծ հայոց ազգային բանակին, առկա են այդ նվիրաբերությունները փաստող փաստաթղթերը:
Ա. Սարիբեկյանը այժմ ՀՀ հանրային խորհրդի գյուղատնտեսության եւ բնապահպանության հանձնաժողովի անդամ է: Նա մեծապես տարված է Տավուշի մարզկենտրոն Իջեւանում մեծ ֆիդայու Սեւքարեցի Սաքոյի հուշարձանը եւ թանգարանը հիմնելու գաղափարով: Նա այդ նպատակով երկու անգամ հանդիպել է ՀՀ վարչապետ Տիգրան Սարգսյանին, Իջեւանի նախկին քաղաքապետ Վարուժան Ներսիսյանին, նաեւ՝ Տավուշի մարզպետ Արմեն Ղուլարյանին եւ Իջեւանի գործող քաղաքապետ Վարդան Ղալումյանին: Ա. Սարիբեկյանը համոզված է , որ Իջեւանում Սեւքարեցի Սաքոյի արձան եւ թանգարան հիմնելու նպատակով գումարներ նվիրաբերողներ կլինեն: Հակառակ դեպքում այդ նպատակով Ա. Սարիբեկյանը պատրաստ է իր անձնական միջոցները նվիրաբերել:
«Տունս, տեղս էլ կծախեմ, բայց Սեւքարեցի Սաքոյի հուշարձանը Իջեւանում պետք է կանգնեցվի»՝ ասում է Ա. Սարիբեկյանը: Նա համոզված է, որ Իջեւանի Ազատամարտիկների հրապարակի մերձակա, Սեւքարեցի Սաքոյի փողոցում գտնվող կիսակառույց շինությունը պետք է թանգարանի վերածվի:
Կարդացեք նաև
Ոսկան ՍԱՐԳՍՅԱՆ
