Բաղրամյան 25 շենքի բնակիչներին ամեն տարի խոստումներ են տվել ու մոռացել
Չորս տարի անընդմեջ Մ. Բաղրամյան 25 շենքի համատիրության նախագահության անդամ Կառլեն Ղարիբյանը դիմում է թաղային եւ քաղաքային իշխանություններին՝ կանաչապատ տարածքի կիսաքանդ հենապատը վերակառուցելու խնդրանքով: Համատիրության անդամը, նկարագրելով հենապատի քանդման հետեւանքով վերոնշյալ հասցեի բնակիչների կրած անհարմարությունները, հատկապես՝ ձմռան եւ անձրեւային եղանակներին, մտահոգություն է հայտնել նաեւ մայթերի ցեխոտ ու անմխիթար վիճակի մասին: Սակայն ամեն տարի քաղաքային իշխանությունները Կառլեն Ղարիբյանի նամակներին ի պատասխան՝ հայտնել են, որ հենապատի վերակառուցման աշխատանքները նախատեսում են ընդգրկել եկող տարվա ծրագրերում: «Առավոտի» խմբագրություն դիմած Կառլեն Ղարիբյանը եւս մեկ անգամ դիմում է Երեւանի քաղաքապետ Տարոն Մարգարյանին. «Ուզում եմ, որ պատկերացնեք, թե հորդառատ անձրեւաջրերից հետո ինչքան ցեխ է հոսում մայթերի վրա, որը մի քանի օր շարունակ ոտնահետքերով տեղափոխվում է մոտակա շենքերի բնակիչների բնակարաններ: 2009թ. սկսած՝ քաղաքային իշխանությունները խոստանում են, թե տվյալ աշխատանքը կընդգրկվի 2010թ., 2011թ., 2012թ. վարչական շրջանի աշխատանքային ծրագրերում, մինչ օրս այդ հենապատը ավելի ուժգնորեն է քանդվում, որը շատ տգեղ տպավորություն է թողնում Արաբկիրի շրջանի մուտքի կենտրոնից ավարտական տեսքը ապահովելու համար։ Խնդրում ենք հենապատի վերականգնման աշխատանքները գոնե այս օրերին նախատեսել»:
Սեփ. լր.
«Առավոտ» օրաթերթ
