«Այսօր մենք չունենք քաղաքական առումով քաղաքական քաղաքապետարան: Նստարան սարքելով, ծաղիկ ցանելով ավելի շատ փողերի լվացում է արվում: Մենք գործ ունենք դասական առումով կրիմինալի հետ, չունենք քաղաքական պատասխանատվություն»,- այսօր «Մեդիա կենտրոն»-ում կազմակերպված «Ավագանու ընտրություններին ընդառաջ. Երևանի զարգացման տեսլականը» թեմայով բանավեճի ընթացքում հայտարարեց «Առաքելություն» կուսակցության ներկայացուցիչ Մանուկ Սուքիասյանը:
Ավագանու ընտրություններին մասնակցող կուսակցություններից միայն ՀՀԿ ներկայացուցիչը ներկա չէր բանավեճին: Ուստի, երբ քննարկվում էր Երևանի կենտրոնում էլիտար կոչված կառույցների հայտնվելը, ԲՀԿ մամուլի խոսնակ Տիգրան Ուրիխանյանը նշեց. «Կուզեի, որ նրանք լինեին այստեղ, ովքեր ստորագրել են որոշումներ, ովքեր իրականացրել են Երևանի կառավարումը: Թող ասեին, թե իրավիճակը շտկելու առումով ինչպես են փոփոխություն իրականացնելու»:
Այս առիթով Մ. Սուքիասյանն էլ հեգնեց. «Էլ տեղ չի մնացել կառուցելու, իսկ այդ ապօրինի կառույցների սեփականության վկայականներն այսօր որպես ընտրակաշառք բաժանվում են ինչ-ինչ մարդկանց»:
ՀԱԿ ներկայացուցիչ Արամազդ Ղալամքարյանն էլ նշեց. «Ամեն ինչ պիտի անել մարդու համար, այն, ինչ պակասում է այսօրվա քաղաքապետարանին»:
Կարդացեք նաև
Տ. Ուրիխանյանն էլ վրդովվեց. «Քաղաքային իշխանությունների քթի տակ՝ ոռոգման մեծ հարթակ կա: Ի՞նչն էր խանգարում այդտեղ տնկել ծառեր»: Մ. Սուքիասյանն էլ կրկին հեգնեց. «Եթե այդքան տնկած ծառերին հետևեին և դրանք աճեին, ապա Հայաստանը կդառնար ջունգլիներ: Բայց իրականում Երևանը գնում է անապատացման»:
«Բարև Երևան» դաշինքի ներկայացուցիչ Անի Քոչարն էլ այդ հիմնախնդրի վերաբերյալ ասաց, թե ցուցադրաբար մի քանի ծառ ու թուփ տնկելը հարց չի լուծում և ահազանգեց, թե անապատացումը բերելու է շնչառական և այլ բնույթի հիվանդությունների տարածման:
Տրանսպորտային խնդիրները ևս քննարկվեցին: ՕԵԿ ներկայացուցիչն ասաց. «Հասարակական տրանսպորտը դարձել է մարդկանց համար այն բեռը, որի պատճառով մարդիկ առավոտյան չկամությամբ են տանից դուրս գալիս, որ հասնեն աշխատանքի: Այսօրվա հասարակական տրանսպորտի աշխատանքը ուղղված է մի քանիսի գրպանները»:
Ա. Ղալամքարյանն էլ նշեց, որ ՀԱԿ-ը տրանսպորտի խնդրի լուծման համար առաջարկում է այն 35 միլիոն դրամը, որ իշխանությունն ուզում է հատկացնել Երիտասարդական մետրոյի կայարանի երկրորդ մուտք կառուցելու համար, ներդնել Աջափնյակ վարչական շրջանում մետրոյի նոր կայարանի ստեղծման համար:
ՀՅԴ ներկայացուցիչ Արթուր Եղիազարյանը վերհանեց ավագանիում հավասարակշռվածության ապահովման հարցը ու հավելեց. «Վերահսկման մեխանիզմների ստեղծումը Երևանի ավագանիում թույլ կտա ապահովել հավասարակշռվածություն ու փոքրամասնություն կազմող քաղաքական ուժերը կստանձնեն վերահսկողի դերը: Սրանով միայն հնարավոր կլինի գնալ համապետական փոփոխությունների»:
Բանավեճի կուրյոզային միջադեպն այն էր, որ Տ. Ուրիխանյանն իր խոսքում Վարդան Օսկանյանի փոխարեն նշեց Վարդան Քոչարյան ազգանունը, իսկ Քոչարյան ազգանունը առաջացրեց մասնակիցների ծիծաղը: Նա հետո պարզաբանեց, թե ինքը նկատի ուներ իրենց լրատվականի աշխատանքները համակարգող Վարդան Քոչարյանին:
Տաթև ՀԱՐՈՒԹՅՈՒՆՅԱՆ
