Aravot.am-ը տեղեկություն էր ստացել, որ ոստիկանության Երեւան քաղաքի վարչության նախկին պետ Ներսես Նազարյանը «ԻՄԷՔՍ ԳՐՈՒՊ»-ի, որը հանրությանն ավելի շատ հայտնի է «Իդեալ» անունով, բաժնետերերից է:
Թերեւս հենց այդ հանգամանքը նկատի ունենալով էլ, ՀՀ ոստիկանությունն իր տարածած հայտարարության մեջ Ներսես Նազարյանի պաշտոնանկության պատճառների մասին նշել էր. «Ոստիկանության համար սկզբունքային է ծառայության և բիզնեսի համատեղման բացառումը, այսպես ասած՝ սերտաճումը հասարակության որոշակի շերտերի հետ»:
«Պաշտոնական հիմնավորման մեջ նշված էր Ներսես Նազարյանի բիզնեսի եւ աշխատանքի անհամատեղելիությունը, բայց կարծես ինքը վաղուց բիզնես ուներ եւ դա Ձեզ հայտնի էր», – «Ազատություն» ռադիոկայանի թղթակցի այս դիտարկմանն էլ` ՀՀ ոստիկանապետ Վլադիմիր Գասպարյանը պատասխանել էր. «Իհարկե, ինձ հայտնի է: Բայց ես այսպես եմ մոտենում, ես օրենքի մարդ եմ` բիզնեսը իր անձի վրա ձեւակերպված չէ, ես հասկանում եմ, որ սա օրենքի առումով նորմալ է: Բայց մարդկային առումով հո ես ինքս ինձ չե՞մ խաբելու: Դա էլ կա, իհարկե, բայց պետք է կողմնորոշվել` կամ-կամ»:
Խոսքը, մեր տեղեկություններով, ոչ միայն հայտնի «Մոսկվիչկա» սուպերմարքեթների ցանցի մասին չէր, որի սեփականատերը Ներսես Նազարյանի որդին է, այլ հենց «ԻՄԷՔՍ ԳՐՈՒՊ»-ի:
Կարդացեք նաև
Ըստ որոշ տեղեկությունների, պարոն Նազարյանը ոչ թե որդու, զոքանչի կամ իր տիկնոջ անունով է ձեւակերպել իր բիզնեսը, ինչպես որ սովորաբար անում է մեր երկրի բարձրաստիճան պաշտոնյաների մեծամասնությունը, այլ հենց իր: «ԻՄԷՔՍ ԳՐՈՒՊ»-ը, բացի «Իդեալ» խանութների ցանցից, հանդիսանում է նաեւ հայտնի բրենդային մի շարք խանութների սեփականատերը մեր երկրում:
Պարոն Նազարյանից չհաջողվեց այս տեղեկությունը ճշտել. նրա բջջային հեռախոսը օրվա տարբեր ժամերին պարբերաբար «զբաղված» էր ցույց տալիս:
Սակայն Aravot.am-ի հարցերին պատասխանեց «ԻՄԷՔՍ ԳՐՈՒՊ»-ի սեփականատեր Նորիկ Խաչատրյանը. «Նման բան չկա: Ոչ մի փաստաթուղթ գոյություն չունի, որտեղ պարոն Նազարյանը մեր բաժնետերն է: Անգամ նման միտք չի եղել»,-վստահեցրեց Նորիկ Խաչատրյանը:
Լուսինե ԲՈՒԴԱՂՅԱՆ
