Այսօր «Պոստ սկրիպտում» ակումբում ՀՀ նախագահի թեկնածու Պարույր Հայրիկյանի փաստաբան Լեւոն Բաղդասարյանը հայտնեց, որ Հայրիկյանի մահափորձի գործով նախաքննությունն ավարտված է, ինչի առիթով կան երեք ձերբակալվածներ. «Այս առումով մենք ունենք դիտողություններ եւ միջնորդություններ, որոնք վերաբերում են ոչ միայն պատվիրատուին: Քննվել են տասնյակ մարդիկ, այսինքն նրանք, ովքեր որ պետք է քննվեին»:
Aravot.am-ի դիտարկմանը` Վարդան Սեդրակյանի փաստաբան Ալեքսանդր Սիրունյանը լրագրողների հետ հանդիպման ժամանակ հայտարարեց, թե գործով ձեռք բերված ապացույցները շատ թույլ են, Բաղդասարյանը ասաց. «Ես չեմ կիսում Սիրունյանի կարծիքը, թե գործով ձեռք բերված ապացույցները թույլ են»:
Իսկ թե ինչու իրականացվեց այդ մահափորձը, Բաղդասարյանը նշեց` «Կարծում եմ՝ տարբեր պատճառներ կան, առաջինը՝ նրան ուզում էին սպանել, ապա, որ խարխլեն պետական հիմքերը, որ թուլացնեին վերջինիս ունեցած քաղաքական լավ անցյալը եւ այլն»:
Եվա ՀԱԿՈԲՅԱՆ
