82-ամյա կինը որդուն ծխախոտի փող չի տվել, եւ դա նրան կյանք է արժեցել:
Ապրիլի 13-ին Լոռու մարզի առաջին ատյանի դատարանի դատավոր Մուշեղ Հարությունյանը ՀՀ քրեական օրենսգրքի 112 հոդվածի 2-րդ մասի 14-րդ կետով( «Դիտավորությամբ առողջությանը ծանր վնաս պատճառելը, որն ազգուշությամբ առաջացրել է մահ») Ալավերդի քաղաքի բնակիչ, 1961թ. ծնված Գառնիկ Ալմարտունի Վարդանյանին դատապարտեց 7 տարի ազատազրկման:
Կարդացեք նաև
Դատարանն ապացուցված համարեց այն, որ Գ. Վարդանյանը 2012թ. հունվարի 18-ին, ժամը 17-ի սահմաններում Ալավերդի քաղաքի Սանահին-Սարահարթ թաղամասի իր բնակարանի ննջասենյակում մոր՝ Լուսիկ Վարդանյանի կողմից կենսաթոշակի գումարները ընտանիքի կարիքների համար չծախսելու պատճառով վիճաբանել է մոր հետ,որի ընթացքում դիտավորյալ հարվածներ է հասցրել նրա գլխին եւ մարմնի տարբեր մասերին , որոնք առաջացրել են գլխուղեղի սալջարդ, գլխուղեղի այտուց եւ այլ վնասվածքներ: Ստացած վնասվածքներից Լուսիկ Վարդանյանը 2012թ. փետրվարի 8-ին մահացել է:
Դատարանում Գ. Վարդանյանը իրեն մեղավոր չի համարել, ասելով, որ ինքը մորը չի հարվածել, նա ծեր կին էր, 82 տարեկան, արյան բարձր ճնշում ուներ, վայր է ընկել, որ իր քույրերը գալիս էին եւ իր քույրերը ցանկանում են մոր կուտակած գումարը տանել, իրենց տունը խլել: Նախաքնննության ընթացքում Գառնիկ Վարդանյանը ցուցմունք է տվել,որ հունվարի 18-ի երեկոյան ինքը մորից 200 դրամ է խնդրել ծխախոտ գնելու համար, սակայն վերջինս մերժել է, հետո մայրը սկսել է իրեն կշտամբել,թե ինչո՞ւ իր կենսաթոշակով պետք է պահի նրան, վառելափայտ գնի, ինքը վեճի ժամանակ մորը հրել է, եւ վերջինս ընկել է շուրջ 10 հատ մետաղյա կաթսաների վրա: Դատավճիռ կայացնելիս դատարանը հաշվի է առել նաեւ այն, որ Գ. Վարդանյանը 3-րդ խմբի հաշմանդամ է, նրա խնամքի տակ է գտնվում երկրորդ խմբի հաշմանդամ կինը: Դատավճիռը մեկ ամսվա ընթացքում կարող է բողոքարկվել:
Ոսկան ՍԱՐԳՍՅԱՆ
