Պուրակը բացվեց Գրողների միության հարևանությամբ:
Այսօր Հայաստանի Գրողների միության հարևանությամբ բացվեց Պոեզիայի պուրակը: Միջոցառմանը, որն իրականացավ Պոեզիայի միջազգային 1-ին փառատոնի շրջանակում, մասնակցում էին փառատոնի հայ եւ օտարերկրյա հյուրերը: Աշխարհի 30 երկրի ներկայացուցիչները պուրակում տնկեցին գնդաձեւ ակացիաներ` յուրաքանչյուրը տվյալ երկրի անունը կրող պիտակով:
«Սա մի խորհրդանշական պոետական այգի կլինի»,-Aravot.am-ի հետ զրույցում ասաց Հայաստանի գրողների միության նախագահ Լևոն Անանյանը` տեղեկացնելով, որ պուրակը մասն է կազմում «Նոր գիրք» գրախանութի եւ առաջիկայում նախատեսվելիք «Գրական հանդիպումներ» սրճարանն ամբողջացնող համալիրի: «Ամիսներ առաջ է ԳՄ հարեւանությամբ բացվել փոքրիկ «Նոր գիրք» գրախանութը: Այն հիմնվել է այն սկզբունքով, որ ամռանը դրանում պետք է բացվեն միջանցիկ դռներ, իսկ ընթերցողը գիրք վերցնելով` կարող է անմիջապես գրախանութում բացվող դռներից մտնել այգի, որպեսզի գրողը հենց այգում մակագրի գիրքը: Մյուս գաղափարն է` նույն տարածքում հիմնել գրական հանդիպումների սրճարան, որտեղ կկազմակերպվեն գրքերի շնորհանդեսներ, ընթերցողների հետ հանդիպումներ»,-տեղեկացրեց Լևոն Անանյանը` հավելելով, որ գրախանութի հիմնումը խիզախ քայլ է. «Այն պետք է արդարացնի իրեն»:
Փառատոնի շուրջ Անանյանն ասաց, որ Հայաստանը պոեզիայի երկիր է, որն ունի ներկայանալի եւ մրցունակ պոեզիա. «Կարեւոր է, որ մենք բացենք աշխարհի հետ համագործակցության կամուրջները: Այդ ուղղությամբ մեծ գործ է կատարվել. վերջին տարիներին ԳՄ-ն ժամանակակից հայ պոեզիան, դրամատուրգիան եւ արձակը թարգմանել է տասնյակ լեզուներով եւ դրել միջազգային շրջանառության մեջ»:
Կարդացեք նաև
Մեր զրուցակիցն ասաց, որ նախապես մտահղացում կար Պոեզիայի պուրակը հիմնել Մաշտոցի պուրակում, բայց երիտասարդները չեն ցանկացել, որ այգին կոչվի Պոեզիայի պուրակ, քանզի, ըստ Լևոն Անանյանի, իրենք ետ էին նվաճել պուրակը. «Մտածեցի, որ հենց գրողների միության հարեւանությամբ պետք է լինի Պոեզիայի պուրակը»: Պարոն Անանյանը նաեւ նշեց, որ Երևանի քաղաքապետարանն է տրամադրել Իրանից բերված գնդաձեւ ակացիաները:
«Ուրախ եմ, որ խորհրդանշորեն կխշխշա Պոեզիայի պուրակը»,-եզրափակեց Լևոն Անանյանը:
Լուիզա ՍՈՒՔԻԱՍՅԱՆ
