Ինչպես ավելի վաղ հայտնել էինք, «Ռեկո ռեկորդս» ընկերության հիմնադիր Դավիթ Խանոյանը եւ «Disk world» խանութի տնօրեն Կարեն Քյուփելյանը լրագրողներին հայտարարեցին, որ ՀՀ էկոնոմիկայի նախարարությունը խոչընդոտում է ձայնասկավառակներ արտադրող ընկերությունների աշխատանքը եւ շրջանցում է ԱԺ-ի ընդունած համապատասխան օրենքը:
Դավիթ Խանոյանն անդրադարձել էր մտավոր սեփականության գործակալության պետին` Արմեն Ազիզյանին եւ նշել, որ գործակալությունն անհիմն եւ անօրինական խոչընդոտներ է ստեղծում աքցիզ ստանալու ճանապարհին:
Խնդրի շուրջ Aravot.am-ը հեռախոսազրույց ունեցավ գործակալության պետ Արմեն Ազիզյանի հետ, ով ասաց. «Դա ակնհայտ սուտ է, ինչպե՞ս կարող եմ ես, կամ որևիցե մեկը նման բան անել, տեսականորեն էլ դա հնարավոր չէ»:
Արմեն Ազիզյանի խոսքով. «Ընկերությունը մեծ մասամբ ներկայացնում է օրենքին հակասող փաստաթղթեր եւ մեծ մասամբ էլ մերժում է ստանում: Կան օրենքով սահմանված պայմանագրեր, որոնք նրանք չեն պահպանում: Նրանք իրավատուի հետ չեն կնքում պայմանագիր, հիմնականում ներկայացնում են ֆոնոգրամներ եւ կատարողների հետ պայմանագրեր, որոնք օրենքին չեն համապատասխանում»:
Կարդացեք նաև
Ինչ վերաբերում է օրենքի 8-րդ կետին, համաձայն որի` «դիմումներին կից ներկայացված պայմանագրերի իսկությունը եւ դրանցում տեղ գտած տվյալները գործակալությունը չի ստուգում», մեր զրուցակիցն ասաց. «Մենք ոչ ստուգում ենք, ոչ էլ կարող ենք ստուգել: «Իսկություն» նշանակում է` պայմանագիրն իսկակա՞ն է, թե ոչ: Դա մենք չենք ստուգում, բայց պայմանագիրն ինքն ապօրինի է: Իրենք ճիշտ չեն մեկնաբանում «իսկություն» բառը եւ մոլորեցնում են բոլորին»:
Լուիզա ՍՈՒՔԻԱՍՅԱՆ
