Այսօր ոստիկանների նկատմամբ հանրային վստահության բարձրացման համար խորհրդարանական լսումների ժամանակ ժուռնալիստների «Ասպարեզ» ակումբի նախագահ Լեւոն Բարսեղյանը փոխոստիկանապետ Արթուր Օսիկյանին մի քանի հարց ուղղեց. «Որքա՞ն մարդ է աշխատում ՀՀ ոստիկանությունում եւ որքա՞նն են նրանցից ոստիկաններ: Ապրիլի 9-ին լրագրողներին հարցազրույց տալիս՝ ոստիկանապետ Վլադիմիր Գասպարյանը լրագրողին կոչել է դմբո, փոքրիկ դմբո, ուզում էի իմանալ՝ ի՞նչ իրավունքով է դա արել: Ապրիլի 9-ին ոստիկաններից մեկը ծեծել է քաղաքացիներից մեկին եւ սեռական բնույթի հայհոյանքներ արել, ծառայողական քննություն սկսվե՞լ է: Խնդրում եմ ասեք՝ կա՞ ինչ-որ մի ժամկետ, երբ իմանանք, որ անցման այս շրջանից դուրս ենք եկել եւ համբերությամբ սպասենք այդ ժամկետին, եթե կա»:
Արթուր Օսիկյանը պատասխանեց. «Որքան ոստիկան է աշխատում՝ չեմ կարող հայտարարել: Կան ոստիկաններ, որոնք ոչ ոստիկանական համազգեստ են կրում 500 հոգի են մոտ: Ոստիկանապետի ասածի հետ կապված տեղյակ չեմ ինչի մասին է խոսքը, ցանկացած հարցադրում ամեն դեպքում պետք է չընդունել՝ որպես վիրավորանք: Ինչ վերաբերում է ուժի կիրառմանը որոշ դեպքերում, եթե ինչ-որ օրինակ ունեք, ցանկացած դեպքում քննություն կատարվում է, քննության արդյունքները կհրապարակվեն եւ վերջնական գնահատականը կտրվի համապատասխան անձանց կողմից»:
Իսկ թե երբ է ավարտվելու անցման շրջանը՝ պարոն Օսիկյանն ասաց, որ չի կարող կոնկրետ ժամկետ նշել:
Հռիփսիմե ՋԵԲԵՋՅԱՆ
