Ապրիլի 17-ի առավոտյան, ժամը 05.15-ի սահմաններում Վրաստանի սահման-Ալավերդի-Վանաձոր ավտոճանապարհի 5-րդ կիլոմետում տեղի է ունեցել վթար: Դրա հետեւանքով զոհվել է Վրաստանի Մառնեուլիի շրջանի Շահումյան գյուղի 37-ամյա բնակիչ Բախշիկ Օկոյանը:
Դեպքից երկու ժամ անց լինելով վթարի վայրում՝ տեսանք, որ շորով ծածկված նրա դիակը գտնվում է միջպետական ճանապարհի վրա:
Նոյեմբերյանի բժշկական կենտրոնի «Շտապ օգնության» խումբը 5-ն անց 50-ի սահմաններում մեկնել է դեպքի վայր: Շտապ օգնության ծառայության բուժքույր Կարինե Աբովյանը մեզ ասաց, որ մահացածի մարմինը շատ վնասված վիճակում էր, նպատակահարմար չէր այն տեղափոխել բժշկական կենտրոն: Շտապ օգնության խումբը մոտ մեկուկես ժամ գտնվել է պատահարի վայրում: Բուժքույր Կարինե Աբովյանի վկայությամբ ՝վթարից վիրավոր, Շահումյան գյուղի բնակիչ, 26-ամյա Կամո Անտոնյանը հավանաբար տեղափոխվել է Ալավերդու հիվանդանոց:
Բախշիկ Օկոյանի դիակը գտնվում էր վրացական պետհամարանիշերով «ֆուռի» եւ վրացական պետհամարանիշերով «Ֆոլսկվագենի» բախման վայրից մոտ 500մ հեռավորության վրա:
Կարդացեք նաև
Վթարի վայրում էին գտնվում «DAF» մակնիշի «GE SAJ-800» պետհամարանիշերով խոշոր բեռնատարը եւ«Ֆոլկսվագեն» մակնիշի « GE DDS-350 » պետհամարանիշերով մարդատարը: Զրուցեցինք երկու մեքենայի վարորդների հետ: Մարդատարի վարորդ, Շահումյան գյուղի բնակիչ, 1982 թ.ծնված Սեյրան Անտոնյանը մեզ պատմեց, որ իրենք սինդրիկ էին տեղափոխում Երեւան, որպեսզի վաճառեին, վաղ առավոտյան իր մեքենայի վառելիք գազը սպառվել էր:
Մոտակայքում գտնվում է ավտոգազալցավորման ճնշման կայան: Մեքենայի 3 ուղեւորները՝ Սեյրանի եղբայր Կամո Անտոնյանը, հարեւան Բախշիկ Օկոյանը եւ Կամոյի բարեկամ Աշոտ Շլեպչյանը հրել են մեքենան, որպեսզի այն հասցնեն գազալցավորման կայան: Այդ ժամանակ մեքենան հրողներին հետեւից հարվածել է վրացական համարանիշերով «ֆուռը»:
Սեյրան Անտոնյանն ասաց.որ ինքն այդ ժամանակ միացրել էր մեքենայի հետեւի մասում գտնվող լուսային թարթիչը: «ֆուռի» վարորդ,Վրաստանի քաղաքացի, 1953թ. ծնված Գիվի Խուբուլավան մեզ ասաց, որ ինքը վրացական ընկերության բեռնատարով սպիրտ էր տեղափոխում Երեւան:
Նրա խոսքերով՝ բեռնատարի ապակին ներսից քրտնել էր, ինքը սրբիչով մաքրում էր այն, մութ էր, իսկ առջեւում գտնվող «Ֆոլսկվագենի» լուսային թարթիչը միացված չէր: Վրացի վարորդն ասաց,որ զոհը եղել է ոչ իր մեքենայի բախման հետեւանքով, որ Բախշիկ Օկոյանի դին գտնվում է իրենց վթարի վայրից մոտ 500 մ հեռու: Նա եւ իր գործընկեր վրացական մեկ այլ բեռնատարի վարորդ մեզ պատմեցին, որ «Ֆոլսկագենը» հրող 3 տղաներին հարվածել է մարդատար մեքենա, ենթադրաբար«Օպել» մակնիշի, որի վարորդը ճողոպրել է դեպքի վայրից:
Վրացի վարորդներն ասացին, որ այդ «Օպելի» պահեստամասերը թափված են դեպքի վայրում: Ճանապարհատրանսպորտային պատահարի վայրում աշխատում էին ոստիկանության Բագրատաշենի բաժանմունքի պետ Կարեն Անտոնյանը, Նոյեմբերյանի ոստիկանության քննչական բաժնի պետ Արթուր Մովսիսյանը , ՃՈ 2-րդ գումարտակի 5-րդ վաշտի 2-րդ դասակի հրամանատար Սմբատ Նորեկյանը, նույն դասակի վարչական պրակտիկայի գծով ավագ տեսուչ Վահե Վարդանյանը, ճանապարհային ոստիկանության հետաքննիչ Մխիթար Գիշյանը, ոստիկանության այլ աշխատողներ:
Ոսկան ՍԱՐԳՍՅԱՆ
